प्रदेश राजधानी हेटौँडामा नै उपयुक्त हुन्छ : बानियाँ

२४ असोज, हेटौँडा । नेपाली कांग्रेस प्रदेश ३ संसदीय दलका नेता ईन्द्रबहादुर बानियाँले प्रदेश नम्बर ३ को राजधानी हेटौँडामा नै उपयुक्त हुने बताएका छन् । 
रणनीतिक रुपमा उपयुक्त रहेकाले नै शेरबहादुर देउवा नेतृत्वको सरकारले अस्थायी राजधानी हेटौँडामा तोकेको उनको भनाई थियो । नेपाल प्रेस युनियन मकवानपुरले बुधबार आयोजना गरेको शुभकामना अदानप्रदान एवं चियापान कार्यक्रममा बोल्दै नेता बानियाँले राजनीतिक आग्रह पूर्वाग्रहमा नलागी एकमत भएर राजधानी अव हेटौँडामा नै कायम गर्न सबै जुट्नुपर्ने बताए । सडक सञ्जाल, सुरक्षा संवेदनशिलता र रणनीतिक दृष्टिकोणलेप्रदेश नम्बर ३ को राजधानी हेटौँडा उपयुक्त रहेको उनको भनाई थियो । 
गणितिय हिसावले आवश्यक मत नेकपासंग रहेको भन्दै बानियाँले यसका लागि नेकपाका अध्यक्ष एवं प्रधानमन्त्री केपि शर्मा ओली तयार हुनुपर्ने बताए । अधिकांश प्रदेशसभा सदस्य राजधानी अन्यत्र तोक्नुपर्ने मनस्थितिमा रहेकाले प्रधानमन्त्री ओलिले चाहे राजधानी हेटौँडामै रहने उनको भनाई थियो । राजधानीका लागि हेटौँडा नै उपयुक्त रहेको विषयमा संचारमाध्यमलाई एक ठिक्का भएर कलम चलाउन उनको आग्रह थियो ।
युनियन मकवानपुरका अध्यक्ष कुमार अधिकारीको सभाध्यक्षतामा भएको कार्यक्रममा नेपाल पत्रकार महासंघका अध्यक्ष हरि हुमागाई, युनियनका सचिव केशव समर्पण लगायतले मन्तव्य व्यक्त गरेका थिए । कार्यक्रममा विभिन्न पेशागत संगठनमा आवद्ध पत्रकारहरुका अध्यक्ष एवं पत्रकारहरुको सहभागिता रहेको थियो ।