लामिटार कपः आयोजक लामिटर र जनजागरण क्लब सेमिफाइनलमा प्रवेश 

२५ असोज, हेटौँडा । मकवानपुरको हाडीखोलामा जारी प्रथम लामिटार कप फुटबल प्रतियोगितामा आयोजक लामिटार यूथ क्लवको ए टिम र मसिनेको जनजागरण क्लव सेमीफाइनल प्रवेश गरेका छन् ।
बिहीबार भएको पहिलो खेलमा आयोजक लामिटरले पाल्दमारको आरआर एफसीलाइ ३–० गोल अन्तरले हराउँदै सेमिफाइनलमा स्थान बनाएको छ । लामिटारको जितमा क्याप्टेन सुमन राईले २ गोल गरे भने एक गोल उपहार स्वरुप पायो । खेलको म्यान अफ द म्याच लामिटारका राइ घोषित भए । 
यस्तै बिहीबार भएको दोस्रो खेलमा खरङ्गा एफसी मनहरीलाई हराउदै मसिनेले सेमिफाइनलमा स्थान बनाएको छ । मसिनेले खरङ्गालाई ३–१ गोल अन्तरले हराएको हो । मसिनेको तर्फबाट कुमार लामाले पेनाल्टी मार्फत गोल गर्दै टिमलाई अग्रता दिलाएका थिए । यस्तै मसिनेको जितमा मनिष लामा र बिनय लामाले एक–एक गोलको गरे । खरङ्गाको तर्फबाट एकमात्र गोल पेनाल्टी मार्फत सुनिल मल्लले गरे । 
खेलको म्यान अफ द म्याच मसिनेका कुमार लामा भए ।
जारी प्रतियोगितामा शुक्रबार सेमीफाइनल प्रवेशको लागि हरियाली युवा क्लव ज्यामिरे र सुनाचुरीको सयपत्री युवा क्लव विच खेल हुने छ भने अर्को खेल प्रतापपुर युवा क्लव र शक्ति युवा क्लव मनहरीको बीच हुनेछ ।
प्रतियोगितामा खेलकुद समन्वय समिति हेटौंडा–१९ का अध्यक्ष राजु घलेले म्यान अफ द म्याचको व्यवस्था गरेका हुन् । ३० गते फुलपातिको दिन सम्म सन्चालन हुने प्रतियोगितामा मनहरी गाउँपालिकाको २१ वटा क्लवको सहभागिता रहेको छ । 
प्रतियोगिताको बिजेताले नगद ५० हजार र उपबिजेताले नगद २५ हजारसहित ट्रफी, मेडल र प्रमाणपत्र प्राप्त गर्नेछ । यस्तै बिधागत उत्कृष्ट खेलाडीलाई समेत नगदको व्यवस्था गरिएको आयोजक लामिटार यूथ क्लवले जनाएको छ ।