फुटबलमा बंशगोपाल युवा क्लव बी विजयी

२६ असोज, हेटौंडा । स्वर्गीय राजु सापकोटाको स्मृतिमा हेटौडा–६ चौघडामा रहेको बंशगोपाल माविको खेल मैदानमा भएको एट ए साईड फुटबल प्रतियोगिताको उपाधि बंशगोपाल युवा क्लव बी पुतलीबजार विजयी भएको छ । 
शुक्रवार भएको फाईनल खेलमा बंशगोपाल युवा क्लव बी पुतलीबजार कुमलटार युवा क्लव विचको खेल निर्धारित समयमा दुबै टीमबाट कुनै गोल हुन नसकेपछि खेल पेनाल्टी सुटआउटमा पुगेको थियो । पेनाल्टीमा पनि बराबरी भएपछि निर्णयका लागि सडेन डेथको सहारा लिईएको थियो । सडेनडेथमा बंशगोपाल युवा क्लव बी विजयी भएको थियो । 
विजेता टीमले २७ किलोको खसी, मेडल र प्रमाणपत्र, उपविजेता टीमले २५ किलोको खसी, मेडल र प्रमाणपत्र प्राप्त गरे । प्रतियोगितामा उत्कृष्ठ खेलाडी चौघडा फूटबल टीम जुनियरका सुजल लामा, धेरै गोल गर्ने रामनगर युवा क्लवका मन्दिप बोहरा, खेलको म्यान अफ दि म्याच बंशगोपाल युवा क्लब बी का गोलकिपर प्रविण दुलाल घोषित भए । 
विजयी खेलाडीहरुलाई हेटौंडा उपमहानगरपालिका ६ का वडा अध्यक्ष अर्जुनप्रसाद चौलागाई, प्रहरी चौकी चौघडाका ईन्चार्ज डम्वर बहादुर केसी, कामधेनु बहुउद्धेश्यीय सहकारीका सदस्य धनबहादुर गौतम, जनकल्याण सहकारीका सदस्य दीपक तिवारी संचारकर्मी भीमसेन पौडेल, केदारप्रसाद गौतम, कमल कोइराला लगायतले पुरस्कार वितरण गरेका थिए । समापन समारोह अजय सापकोटाको अध्यक्षतामा भएको थियो ।