राष्ट्रपति विद्यादेवी भण्डारी कतार जाँदै

९ कार्तिक, काठमाडौं । राष्ट्रपति विद्यादेवी भण्डारी कात्तिक १२ गते  कतार जाने भएकी छिन् । परराष्ट्र मन्त्रालयले कार्तिक १२ देखि १५ गतेसम्मको राष्ट्रपति भण्डारीको भ्रमण तालिका सार्वजनिक गरेको छ ।

कतारका अमिर शेख तमीम विन हमाद अल थानीको निमन्त्रणामा राष्ट्रपति भण्डारी कतार जान लागेकी हुन् । उनले कात्तिक १३ गते अमिरि दिवानमा कतारका अमिरसँग भेटवार्ता गर्नेछिन भने सोहि दिन कतारी अमिरले भण्डारीको सम्मानमा आयोजना गर्ने रात्रीभोजमा सहभागी हुने कार्यतालिका छ । राष्ट्रपति भण्डारीसँग कतार फाउन्डेशनका अध्यक्ष एवं सहसंस्थापक श्रीमती शिखा मोजा विन्ट नासरले शिष्टाचार भेट गर्नेछिन् । कात्तिक १३ गते नै राष्ट्रपति भण्डारीले नेपालमा व्यापार र लगानीको अवसर विषयमा त्यहाँको व्यापारिक समुदायलाई सम्बोधन गर्नेछिन्।

यसैगरी राष्ट्रपति भण्डारीले दोहास्थित नेपाली दुतावास र त्यहाँ रहेका नेपाली समुदायसँग भेट्ने कार्यक्रम पनि तय गरिएको छ। राष्ट्रपति भण्डारी दोहा पुग्दा नेपाली राजदूत रमेश प्रसाद कोइरालाले दूतावासको तर्फबाट कात्तिक १२ गते रात्रीभोजको आयोजना गर्नेछन् । भण्डारीको भ्रमण दलमा परराष्ट्र मन्त्री प्रदिप कुमार  ज्ञवाली, परराष्ट्र मन्त्रालयका सचिव शंकर दास बैरागी लगायत सहभागी रहने जनाईएको छ ।