प्रदेश ३ मा समुदाय–प्रहरी साझेदारी कार्यक्रम शुरु

१० कार्तिक, हेटौँडा । प्रदेश नम्बर ३ मा समुदाय–प्रहरी साझेदारी कार्यक्रम आइतबारबाट शुरु भएको छ । प्रहरी प्रधान कार्यालयको आयोजना एवं ३ नम्बर प्रदेश प्रहरी कार्यालयको संयोजनमा हेटौँडामा कार्यक्रम गरी यसको औपचारिक शुभारम्भ भएको हो ।
कार्यक्रममा मकवानपुरका प्रहरी उपरीक्षक बुद्धिराज गुरुङले अवधारणाबारे बताउँदै समुदाय–प्रहरी साझेदारी कार्यक्रम प्रदेश, जिल्ला, वडा, टोल र विद्यालयमा तहमा संचालन हुने जानकारी दिएका थिए । कार्यक्रम शुभारम्भ गर्दै प्रदेश नम्बर ३ का प्रमुख सचिव आनन्दराज ढकालले सरकारले मात्रै सबै क्षेत्रमा काम गर्न नसक्ने भएकाले सामुदायको समेत साथ लिएर शान्ति सुरक्षा कायम गर्न समुदाय–प्रहरी साझेदारी अवधारणा आएको बताए ।
कार्यक्रममा प्रदेश नम्बर ३ का आन्तरिक मामिला तथा कानून सचिव राजकुमार श्रेष्ठ, जिल्ला समन्वय समितिका प्रमुख रघुनाथ खुलाल, मकवानपुरका प्रमुख जिल्ला अधिकारी आशमान तामाङ, हेटौँडा उपमहानगरपालिकाका उपप्रमुख मिना लामा, ३ नम्बर प्रदेश प्रहरी कार्यालयका प्रमुख डिआईजी दिपककुमार थापा लगायतले सामुदायिक–प्रहरी साझेदारी कार्यक्रम समाजमा शान्ति सुरक्षा कायम गर्न प्रभावकारी हुने विश्वास व्यक्त गरेका थिए । 
कार्यक्रममा मकवानपुरका ४ वटा गाउँपालिकासंग कार्यक्रम संचालन सम्बन्धी समझदारी पत्रमा हस्ताक्षर समेत भएको थियो ।