भौतिक पूर्वाधार मन्त्री केशव स्थापित बर्खास्त

१६ कार्तिक, हेटौँडा । प्रदेश नम्बर ३ का मुख्यमन्त्री डोरमणि पौडेलले भौतिक पूर्वाधार तथा विकास मन्त्री केशव स्थापितलाई पददबाट बर्खास्त गरेका छन् ।

मुख्यमन्त्री पौडेलले संविधानको धारा १६९ को उपाधार २ को खण्ड ख अनुसार स्थापितलाई बर्खास्त गरी उनको मन्त्रालयको जिम्मेवारी पनि आफैँले लिएका पौडेलका प्रेस संयोजक प्रकाश दाहालले जानकारी दिए । भौतिक पूर्वाधार तथा विकास मन्त्रालय अब मूख्यमन्त्री पौडेलले नै सम्हाल्ने जनाईएको छ । बर्खास्तीमा परेका मन्त्री स्थापित र मुख्यमन्त्रीबीच बुधबार बसेको प्रदेश मन्त्रिपरिषद्को बैठकमा विवाद भएको थियो । विवादका क्रममा मूख्यमन्त्री पौडेललाई गालिगलौज गरेपछि उनीसंग मूख्यमन्त्री पौडेलसहित अन्यमन्त्री समेत रुष्ट बनेका थिए ।

भौतिक पूर्वाधार विकास मन्त्रालयको गति सुस्त भएको र मन्त्री स्थापितले सार्वजनिक कार्यक्रममा सरकार र मूख्यमन्त्रीको विरोध गरेपछि मूख्यमन्त्री पौडेलले कामलाई ध्यान दिन निर्देशन दिएका थिए । विवादपछि मूख्यमन्त्री पौडेल स्थापितलाई बर्खास्त गर्न रायका लागि प्रधानमन्त्री केपि शर्मा ओलीसंग भेट्न विहिबार काठमाडौं गएका थिए । ओलीसंगको छलफलपछि मूख्यमन्त्री पौडेलले उनलाई बर्खास्त गरेका हुन् । मन्त्री स्थापित भने चीन भ्रमणमा जाने तयारीमा थिए ।