चनौटा सामुदायिक वनको सार्वजनिक सुनुवाई सम्पन्न

१६ कार्तिक, हेटौडा । हेटौडा–१९ सान्ननानीटारमा रहेको चनौटा सामुदायिक वन उपभोक्ता समूहले शुक्रवार समूहको सभाहलमा सार्वजनिक सुनुवाई तथा मिनीभेलाको आयोजना गरेको छ ।
कार्यक्रममा समूहले अघिल्लो आर्थिक वर्षमा गरेका क्रियाकलाप र चालु अर्थिक वर्षमा गरिने प्रस्तावित कार्यक्रमहरुको बारेमा छलफल गरिएको थियो । समूहले यस आर्थिक वर्षमा वन व्यवस्थापन, वन सदुपयोग, आयआर्जन, संस्थागत विकास, अध्ययन भ्रमण, पूर्वाधार विकास लगायतका क्षेत्रहरुमा काम गर्ने प्रस्तावित कार्यक्रममा उल्लेख गरिएको छ । समूहले यस आर्थिक वर्षको लागि करीव २१ लाखको बजेट प्रस्तावित गरिएको समूहका कोषाध्यक्ष श्याम कुमार रिमालले बताए ।
कार्यक्रममा हेटौडा–१९ का वडा अध्यक्ष नरनाथ सुवेदीले १९ वडामा रहेका ७ वटै वन समूहलाई उत्कृष्ठ सामुदायिक वनको रुपमा विकास गर्ने योजना रहेको बताए । समूहले वनको संरक्षणका साथै विकास निर्माणको काम समेत गरिरहेको बताउदै वडा अध्यक्ष सुवेदीले सबैको सामुहिक प्रयासबाट वडाको समग्र विकास गरिने उदघोष समेत गरे ।
समूहका अध्यक्ष रामप्रसाद पौडेलको अध्यक्षतामा भएको कार्यक्रममा सामुदायिक वन उपभोक्ता महासंघ, हेटौडा नगर अध्यक्ष शम्भुप्रसाद न्यौपाने, लामिटार मध्यवर्ती सामुदायिक वन उपभोक्ता समूहका अध्यक्ष गोपी अर्याल,कालिका हरियाली सामुदायिक वन उपभोक्ता समूहका अध्यक्ष मंगलसिह गोले, संचारकर्मी भीमसेन पौडेल, उपभोक्ता हरी पौडेल, कृष्णप्रसाद पौडेल लगायतकाले मन्तव्य व्यक्त गरेका थिए । 
३ सय ४६ हेक्टर क्षेत्रफलमा फैलिएको यो सामुदायिक वनमा ४ सय ४ घरधुरी रहेका छन ।