बेलायत बस्दै आएका ढकालबाट हाँडिखोलामा सहयोग

१६ कार्तिक, हेटौँडा । मकवानपुर ओभरसिज नेटवर्ककका संयोजक चिरञ्जीवी ढकालले हाँडीखोलाका २० जना विद्यार्थीलाई स्टेशनरी सामग्री सहयोग गरेका छन् । 
मकवानपुर घर भै बेलायत बस्दै आएका ढकालले नेपाल आएको सन्दर्भमा हाँडीखोलाका विद्यार्थीहरुलाई स्टेशनरी सामग्री सहयोग गरेका हुन् । विद्यार्थीको पठनपाठनमा सहयोग होस् भन्ने उद्देश्यले उनीहरुको लागि आवश्यक सामग्री सहयोग गरेको उनले जानकारी दिए । ‘हाँडीखोलासंग मेरो सानैदेखिको छुट्टै सम्बन्ध छ । यहाँ आएको बेला स–साना बालबालिकाको पढाईमा सहयोग पुगोस् भनेर स्टेशनरी सामग्री सहयोग गरेको हुँ’, केही बर्ष हाँडीखोलामै आफ्नो समय बिताएका ढकालले भने, ‘यहाँ आएको बखत् केही न केही सहयोग गरौँ भन्ने लाग्छ र सहयोग पनि गरिरहेको हुन्छु, सोही अभियान अन्तर्गत स्टेशनरी वितरण गरेको हुँ ।’ 
ढकालले यसअघि हाँडीखोलामा एम्बुलेन्स खरिद् अभियानको नेतृत्व गरेका थिए भने महेन्द्रज्योति उच्च माविमा कम्प्यूटर तथा सोलार सहयोग गर्नुको साथै लामिटार कप फुटबलमा समेत आफ्नो आमाको नाममा दोस्रो पुरस्कार नगद २५ हजार रुपैँया सहयोग गरेका थिए । हाँडीखोलामा अन्य विविध क्षेत्रमा उनले सहयोग गर्दै आएका छन् । ढकाल, स्थानीय समाजसेवी अर्जुन पुडासैनीलगायतले बालबालिकालाई स्टेशनरी सामग्री हस्तान्तरण गरेका छन् ।