डोल्पा जीप दुर्घटनाः मृतक १० जनाकै परिचय खुल्यो 

१९ कार्तिक, हेटौँडा । डोल्पामा जीप दुर्घटना हुँदा १० जनाको ज्यान गएको छ । २ जना घाइते भएका छन् । डोल्पाको दुनैबाट सुपानेका लागि छुटेको  भे १ च १६१० नम्बरको जीप कालगौँडाबाट भेरी नदीमा खसेको थियो । 
जीपमा रहेका १२ जना मध्ये १० जनाको मृत्यु भएको हो । घटनामा परी ७ जना पुरुष र ३ जना महिलाको ज्यान गएको हो । 
घाइते डोल्पा त्रिपुरासुन्दरी नगरपालिका–३, का नन्दबहादुर थापा र चालक दिनेश बोहोराको जिल्ला अस्पताल दुनेमा उपचार भइरहेको प्रहरीले जनाएको छ । 
मृतक सबैको सनाखत भएको प्रहरीले जनाएको छ । दुर्घटनामा परी मृत्यु हुनेमा त्रिपुरा सुन्दरी नगरपालिका–१, त्रिपुराकोटको ४५ वर्षीय हेमराज हमाल, सोही ठाउँकी १८ वर्षीया लक्ष्मी रोकाय, ६२ वर्षीय नरसिँह कठायत, २५ वर्षीय शेरबहादुर थापा, वडा नम्बर २ बस्ने १३ वर्षीया अस्मिता रोकाय, २४ वर्षीय कुमार रोकाय, वडा नम्बर ३ बस्ने ४५ वर्षीय बुध धराला, वडा नम्बर ५ बस्ने १२ वर्षीय याम रोकाय रहेका छन् । 
यस्तै ठूलीभेरी नगरपालिका–५, बस्ने ३० वर्षीय भद्र रोकाय र ठूदीभेरी नगरपालिका–३ बस्ने अन्दाजी वर्ष १७ की मनिसा धराला रहेको जिल्ला प्रहरी कार्यालयले डोल्पाले जनाएको छ । 
दुइजना घाइते मध्ये थापाको अवस्था सामान्य भए पनि जिप चालक बोहोराको अवस्था गम्भीर भएको प्रहरीले जनाएको छ । सबै शवहरु जिल्ला अस्पतालमा राखिएको र मंगलबार पोष्टमार्टम गरेर आफन्तलाई बुझाइने बताइएको छ ।