मन्त्री जम्कट्टेलको पत्रकारलाई प्रश्न : साँच्चै स्वतन्त्र हुनुहुन्छ ?

२९ कार्तिक, हेटौँडा । प्रदेश नम्बर ३ का आन्तरिक मामिला तथा कानूनमन्त्री शालिकराम जम्कट्टेलले पत्रकार साँच्चै स्वतन्त्र हुनु जरुरी रहेको बताएका छन् ।
हेटौँडामा विहिबार फ्रिडम फोरमले गरेको ‘सुरक्षित पत्रकारिता र दण्डिहिनताको अन्त्य’ विषयक अन्तरक्रिया कार्यक्रममा बोल्दै कानूनमन्त्री जम्कट्टेलले यस्तो बताएका हुन् । उनले देशका ठूला परिवर्तनमा संचारजगतको भूमिका प्रशंसनीय रहेको भन्दै पूर्वाग्रहका आधारमा समाचार सम्प्रेषण गर्दा संचारकर्मी असुरक्षित हुनु परेको दावि गरे । उनले कोही पनि पत्रकार स्वतन्त्र नरहेको दावि समेत गरे ।
उनले पत्रकारितामा रहेको विकृति र विसंगति अन्त्यका लागि प्रदेश संचार विधेयक संसदमा पेश भएको बताए । कार्यक्रममा नेपाल पत्रकार महासंघ ३ नम्बर प्रदेशका महासचिव कृष्ण सारु मगर, पाटन उच्च अदालत हेटौँडा बार एशोसियसनका अध्यक्ष विरेन्द्र वली, नेपाल पत्रकार महासंघ मकवानपुरका पूर्व अध्यक्ष राममणी दाहाल, प्रेस युनियन मकवानपुरका अध्यक्ष कुमार अधिकारी लगायतले पत्रकारमाथि भएका आक्रमणका दोषिलाई कारवाही नभएसम्म प्रेस स्वतन्त्रता कायम नहुने र दण्डिहिनताको अन्त्य नहुने भएकाले यसतर्फ राज्य सचेत हुनुपर्नेमा जोड दिएका थिए । 
कार्यक्रम नेपाल पत्रकार महासंघ मकवानपुरका अध्यक्ष हरि हुमागाईको अध्यक्षतामा भएको थियो ।