भौतिक मन्त्रालयको काम तिब्ररुपमा अघि बढ्छः मुख्यमन्त्री पौडेल

३० कार्तिक, हेटौँडा । ३ नम्बर प्रदेशका मुख्यमन्त्री डोरमणि पौडेलले भौतिक मन्त्रालय मार्फतको कामलाई तिब्रता दिईने बताएका छन् । शुक्रबार मन्त्रालयमा भएको छलफलमा बोल्दै उनले प्रदेशको महत्वपूर्ण रहेको मन्त्रलायको कामलाई अब नयाँ ढंगबाट अगाडि बढाईने बताए । 
प्रदेशको बजेटको १३ अर्ब भन्दा बढि बजेट रहेको मन्त्रालयमा चुनौती भएपनि यसलाई सहज ढंगले अगाडि बढाईने उनको भनाई थियो । सुरुवातका दिनमा कर्मचारी व्यवस्थापनमा केहि समस्या भएपनि विस्तारै अब सहज बनाईने उनले दावी गरे ।
योजनाहरुको तुलनामा कर्मचारी कम भएको भएपनि काम अगाडि बढाउन प्रदेश सरकारले लक्ष्य अनुसार चालु आर्थिक बर्षमा नै काम सम्पन्न गराउने उनको भनाई थियो । कर्मचारीलाई काम गर्न सहज बनाउन सरकारले जस्तो सहयोग गर्न सक्ने उनले जानकारी दिए । 
कार्यक्रममा बोल्दै प्रदेशका प्रमुख सचिब आनन्दराज ढकालले नतिजा आउनेगरी काम गर्न निर्देशन दिए । कार्यक्रममा मन्त्रालयका सचिब कौशल किशोर झाले कार्यपत्र प्रस्तुत गरेका थिए । 
यसैगरी मन्त्रालय अन्तर्गत यातायात पूर्वाधार निर्देशनालय एउटा, पूर्वाधार विकास कार्यालयहरु ६ वटा, जलस्रोत तथा सिंचाई विकास डिभिजन १३ वटा, भुमिगत जलस्रोत तथा सिंचाई बिकास डिभिजन ५ वटा, खानेपानी तथा सरसफाई डिभिजन ५ वटा, यातायात व्यवस्था कार्यालय १० वटा, नारायणी लिफ्ट खगेरी सिंचाई व्यवस्थापन कार्यालय एउटा, नयाँ शहर आयोजना कार्यलयहरु २ वटा रहेका छन् । 
कार्यक्रममा भुमि व्यवस्था, कृषि तथा सहकारी मन्त्री दावा दोर्जे लामा, मुख्यन्त्री तथा मन्त्रिपरिषदका कार्यलयका सचिब रमेश शिवाकोटीको पनि सहभागिता रहेको थियो ।