शहीद स्मारक ए डिभिजन लिगः थ्रीस्टारको जित, पुलिस र मच्छिन्द्र बराबरी 

२ मंसिर, हेटौँडा । शहीद स्मारक ए डिभिजन लिग फुटबलमा शतप्रतिशत नतिजा निकाल्ने क्रममा थ्रीस्टार क्लबले आइतबारको खेलमा ब्रिगेड ब्वाइजलाई हराएको छ ।
थ्रीस्टारले लगातार दोस्रो जित हासिल गर्ने क्रममा ब्रिगेड ब्वाइज क्लबलाई ५–१ को फराकिलो अन्तरले हराएको हो । थ्रीस्टारका लागि रञ्जित धिमाल, सुनील बल, रञ्जन विष्ट, निराजन खड्का र कप्तान विक्रम लामाले एक–एक गोल गरे । 
ब्रिगेडका रजत तिवारीले एक सान्त्वना गोल फर्काए । 
यसअघि पहिलो खेलमा फ्रेन्ड्सलाई हराएको थ्रीस्टार गोलअन्तरमा मनाङ मर्स्याङ्दी क्लबलाई पछाडि पार्दै लिग तालिकाको शीर्ष स्थानमा उक्लिएको छ । दोस्रो चरणको खेल चलिरहँदा लिगमा थ्रीस्टार र मनाङले मात्र शतप्रतिशत नतिजा निकालेका छन् । 
यता विजयी सुरुवात गरेको विभागीय टिम नेपाल पुलिस क्लब भने आइतबारको दोस्रो खेलमा मच्छिन्द्र क्लबसँग बराबरीमै रोकिएको छ । ललितपुरको सातदोबाटोस्थित एन्फा कम्प्लेक्समा भएको खेलमा पुलिस र मच्छिन्द्रले गोलरहित बराबरी खेलेका हुन् । यो बराबरीसँगै ४ अंक भएको पुलिस चौथो स्थानमा छ । 
यस्तै पहिलो खेलमा च्यासल युथ क्लबसँग गोलरहित बराबरी खेलेको मच्छिन्द्रको दुई अंक भएको छ ।
लिगमा ४ अंकसहित त्रिभुवन आर्मी क्लब तेस्रो स्थानमा रहेको छ भने एक खेलबाट ३ अंकको संकटा क्लब पाँचौं स्थानमा छ । १४ टिम सहभागी लिगमा जावलाखेल, फ्रेन्ड्स, सरस्वती र ब्रिगेड ब्वाइज अंकविहीन छन् ।