प्रदेशस्तरीय यातायात पूर्वाधार निर्देशनालय शुभारम्भ

७ मंसिर, हेटौँडा । प्रदेश नम्बर ३ सरकारले हेटौँडामा यातायात पूर्वाधार निर्देशनालय संचालनमा ल्याएको छ । प्रदेशको भौतिक पूर्वाधार विकास मन्त्रालय अन्तरगतको निर्देशालय शुक्रबारबाट संचालनमा आएको हो ।
निर्देशनालयको प्रदेशका मूख्यमन्त्री एवं डोरमणी पौडेलले शुभारम्भ गरेका छन् । कार्यक्रममा बोल्दै मूख्यमन्त्री पौडेलले समृद्धिका लागि यातायात पूर्वाधार अत्यावश्यक रहेको भन्दै निर्देशनालयले यसबारे ठोस काम गर्ने विश्वास व्यक्त गरे । भौतिक पूर्वाधार विकास मन्त्री समेत रहनु भएका उनले पैसा लिनेमात्रै भ्रष्टचार नभई काम ठग्नु पनि भ्रष्टाचार भएकोले प्रतिवद्ध भएर काम गर्न निर्देशन दिए ।
कार्यक्रममा प्रदेश नम्बर ३ का प्रमुख सचिव आनन्दराज ढकाल, भौतिक पूर्वाधार विकास मन्त्रालय सचिव कौशलकिशोर झा, निर्देशनालयका निमित्त निर्देशक महेशचन्द्र न्यौपाने लगायतले यातायात पूर्वाधारको क्षेत्रमा रहेका समस्या समाधानमा निर्देशनालयले काम गर्ने बताउँदै प्रदेशमा रहेको यातायात सञ्जाललाई व्यवस्थित गर्न रणनीति तयारमा जोड दिए । कार्यक्रममा प्रदेश नम्बर ३ का सामाजिक विकास मन्त्री युवराज दुलाल, प्रमुख न्यायाधिवक्ता सूर्यचन्द्र न्यौपाने, प्रदेश प्रहरी प्रमुख डिआईजी दिपक थापा लगायतको सहभागिता रहेको थियो । 
निर्देशनालयले प्रदेशका सडक विस्तार, गुणस्तरीयता कायम, अध्ययन अनुसन्धान, सडक सुरक्षा लगायतका क्षेत्रमा काम गर्ने जनाईएको छ । निर्देशनालयमा २३ जना प्राविधिक कर्मचारी रहेका छन् ।