बौद्धिक अपांग अभिभावक संघको अध्यक्षमा पौडेल

८ मंसिर, हेटौँडा । बौद्धिक अपाङ्ग अभिभावक संघको अध्यक्षमा पुनः शारदा पौडेल सर्वसहमत चयन भएकी छन् । हेटौंडामा भएको संघको सातौं साधारणसभा तथा तेस्रो अधिवेशनबाट पौडेलको अध्यक्षतामा ९ सदस्यीय कार्यसमिति निर्वाचित गरिएको हो ।
संघको उपाध्यक्षमा हीरा कार्की, सचिवमा सावित्री पुडासैनी, सहसचिव सुधा दंगाल, कोषाध्यक्ष केशव डंगोल चयन भएका छन् । त्यस्तै, सदस्यहरुमा गीता श्रेष्ठ, काजीमान जिम्बा, दुर्गा प्रधान र जयमान वाइबा रहेका छन् ।
हेटौंडा उपमहानगरपालिकाका मेयर हरिबहादुर महतको प्रमुख आतिथ्य तथा संघकी अध्यक्ष पौडेलको सभाध्यक्षतामा कार्यक्रममा भएको थियो । कार्यक्रममा मेयर महतले बौद्धिक अपाङ्गता भएका विद्यार्थीको शिक्षाको लागि उपमहानगरले दिइरहेको बजेटमा वृद्धि गरिने आश्वासन दिए । डे केयर सेन्टरको भवन निर्माणको लागि पनि उपमहानगरले आर्थिक सहयोग गर्ने उनले प्रतिवद्धता जनाए ।
बौद्धिक अपाङ्गता भएका बालबालिकाहरुलाई संघले हेटौंडा–७ मा ‘डे केयर’ सेन्टर सञ्चालन गरी पढाई तथा खानाको व्यवस्थापन गर्दै आएको छ । नवज्योति माध्यमिक विद्यालयको मातहतमा सञ्चालित डे केयर सेन्टरमा २० जना बौद्धिक अपाङ्ग भएकाहरुलाई शिक्षा प्रदान गर्दै आएको छ । संघले सञ्चालन गरिरहेको डे केयर सेन्टरलाई हेटौंडा उपमहानगरपालिका, माई राइट संस्था र हातेमालो संस्थाले आर्थिक सहयोग गर्दै आएका छन् । संघले एक वर्षको अवधिमा ८ लाख ६६ हजार रुपैयाँ प्राप्त गरेकोमा ४ लाख ६८ हजार रुपैयाँ खर्च भएको बताइएको छ ।