चुच्चेखोला वनको २९ औं साधारणसभा सम्पन्न

८ मंसिर, हेटौँडा । हेटौँडा–६ चुच्चेखोलामा रहेको चुच्चेखोला सामुदायिक वन उपभोक्ता समूहको २९ औं बार्षिक साधारणसभा सम्पन्न भएको छ ।
साधारण सभामा बोल्दै प्रमुख अतिथि प्रतिनिधिसभा सदस्य कृष्णप्रसाद दाहालले वन संरक्षणसंगै सम्बर्धनमा अघि बढ्नुपर्ने बताए । उनले नेपालको समृद्धिका लागि वन क्षेत्र उपयुक्त माध्यम भएको बताउँदै सामुदायिक वनको विकासका लागि आफुले सहयोग गर्ने बताए । वनलाई अध्ययन अनुसन्धानको थलो बनाउनुपर्ने बताउँदै सांसद दाहालले वन क्षेत्रमा जडिबुटि र वन्यजन्तुको संरक्षण एवं आयआर्जनको काम गर्नुपर्ने धारणा राखे ।
साधारणसभामा संस्थाका अध्यक्ष अर्जुनप्रसाद दाहालले प्रगति प्रतिवेदन, लेखा संयोजक श्यामलाल श्रेष्ठले लेखा परिक्षण प्रतिवेदन, कोषाध्यक्ष उदयप्रकाश दाहालले चालु आर्थिक बर्ष ०७५/०७६ को लागि १ करोड ६८ लाख १५ हजार रुपैँयाको अनुमानित आयव्यय विवरण प्रस्तुत गरेका थिए । त्यसैगरी, कार्यक्रममा चोरी शिकारी उपसमितिका सचिव देवेन्द्र चौलागाई र बहुआयामिक महिला आयआर्जन समूहको तर्फबाट पूर्णकुमारी गौतमले प्रगति प्रतिवेदन प्रस्तुत गरेका थिए ।
भेलामा हेटौँडा वडा नम्बर ६ का अध्यक्ष अर्जुनप्रसाद चौलागाई, वडा नम्बर १७ का अध्यक्ष भैरवबहादुर राई, सामुदायिक वन उपभोक्ता महासंघ मकवानपुरका अध्यक्ष साधुराम चौलागाई, डिभिजन वन कार्यालय मकवानपुरका सहायक वन अधिकृत विशाल भट्टराई, नारीचेतना बचत तथा ऋण सहकारी संस्थाकी अध्यक्ष ज्ञानु अर्याल, समूहका पूर्व अध्यक्ष चेतनाथ चौलागाई, लेखा समिति सदस्य कल्पना पराजुली, कार्यालय सचिव केदारप्रसाद गौतम लगायतले मन्तव्य व्यक्त गरेका थिए ।