भारतको कर्नाटकमा बस दुर्घटनाः २८ को मृत्यु 

९ मंसिर, हेटौँडा । भारतको कर्नाटक राज्यमा शनिबार भएको बस दुर्घटनामा मृत्यु हुने व्यक्तिको संख्या २८ पुगेको भारतीय प्रहरीले जनाएको छ । मृतकमध्ये केही छात्रछात्रा पनि रहेको बताईएको छ ।
दक्षिणी राज्य कर्नाटकको मन्द्या जिल्लामा एउटा यात्रुवाहक बस सडकबाट चिप्लिएर नहरको तालमा खस्दा बसमा यात्रारत् २८ जनाको मृत्यु भएको प्रहरीले जनाएको छ । प्रहरीले बसमा कतिजना यात्रा गरिरहेका थिए भन्ने विषयमा केही बताएको छैन । तर, दुर्घटना अत्यधिक तीव्रगतिका कारण गति नियन्त्रण हुन नसक्दा भएको प्रहरीको प्रारम्भिक अनुसन्धानबाट थाहा हुन आएको प्रहरीले जनाएको छ । स्थानीय सन्चारमाध्यमहरुले भने बसमा ३५ जना यात्रा गरिरहेका बताएका छन् । 
यसैबीच, कर्नाटकका मुख्यमन्त्री एच. डी कमास्वामीले दुर्घटनामा परेका पीडितका परिवारलाई राहत सहयोग गर्ने बताएका छन् ।  भारतमा प्रत्येक वर्ष सडक दुर्घटनामा परी एक लाख ५० हजार व्यक्तिले ज्यान गुमाउने गरेका छन् । सेप्टेम्बरमा कर्नाटकको छिमेकी तेलंगना राज्यमा भएको बस दुर्घटनामा पनि ५० जनाको ज्यान गुमेको थियो भने गत बिहीबार मध्ये प्रदेशमा यात्रुवाहक बस विद्यार्थी बोकेको भ्यानसँग ठक्कर खाँदा ६ जना विद्यार्थीको मृत्यु भएको थियो । (एजेन्सी)