मूख्यमन्त्री पौडेलको पहिलो विदेश भ्रमण ‘ओविओआर’ सम्मेलनमा

File Photo

९ मंसिर, हेटौँडा । प्रदेश सरकार बनेको एक बर्ष पुग्न लाग्दा प्रदेश नम्बर ३ का मूख्यमन्त्री डोरमणी पौडेलले पहिलो पटक विदेश भ्रमण गर्ने भएका छन् । मूख्यमन्त्री पौडेल वान बेल्ट वान रोड (ओविओआर) सम्मेलनका लागि कतार जान लागेका हुन् । 

शिखर सम्मेलनमा सहभागी हुन आईतबार राति कतार प्रस्थान गर्ने भएका छन् । मूख्यमन्त्री पौडेलको विदेश भ्रमण संघीय र प्रदेश मन्त्रीपरिषद बैठकले स्विकृत गरेको मूख्यमन्त्रीका प्रेस संयोजक प्रकाश दाहालले जानकारी दिए । कतारका अर्थमन्त्री अहमद विन जसिम विन मोहमद अल्थानीको निमन्त्रणामा मुख्यमन्त्री पौडेलसंगै प्रदेशका उद्योग, पर्यटन, वन तथा वाताबरण मन्त्री अरुण नेपाल पनि ४ दिने भ्रमणका लागि कतार जाने मूख्यमन्त्री तथा मन्त्रीपरिषद कार्यालयले जानकारी दिएको छ । 

कतार र चिनको राजनितिक सम्बन्ध स्थापना भएको ३० औं बर्षको अवसरमा आयोजित कार्यक्रममा नेपालको तर्फबाट मुख्यमन्त्री पौडेल र मन्त्री नेपाल कतार जान लागेको पौडेलको सचिवालयले जनाएको छ । उद्यमीहरु र विशेषज्ञहरुलाई सबै उद्यमहरुसंगै सांस्कृतिक संचार, आर्थिक र व्यापार सहयोग कसरी बढाउने भन्ने विषयमा सम्मेलनमा छलफल हुने भएको छ । विश्वभरबाट ४ सय भन्दा धेरै सरकारी अधिकारीहरू, वक्ताहरुरू, विशेषज्ञहरूले कार्यक्रममा सहभागी हुने भएका छन् । सम्मेलनमा कतार, संयुक्त राज्य, बेलायत, दक्षिण अफ्रीका, टर्की, ओमान, कुवेत, नेपाल, लाओस, स्पेन, सिंगापुरलगायतका प्रतिनिधिहरु सहभागी हुनेछन् ।

संसारभरसंग स्थल मार्गबाट जोडिन ‘वन बेल्ट वन रोड’ को भुमिका महत्वपूर्ण हुने मुख्यमन्त्री पौडेलको भनाई छ । मुख्यमन्त्री पौडेलको टोली मंसिर १३ गते स्वदेश फर्कने छ ।