लोकतान्त्रिक खेलकुद संघले वीपी कप फुटबल गर्ने 

१५ मंसिर, हेटौँडा । ४३ औं मेलमिलाप दिवसको अवसर पारेर नेपाली कांग्रेसको भातृ संगठन लोकतान्त्रिक खेलकुद संघ मकवानपुरले संस्थापक नेता वीपी कोइरालाको स्मृतिमा वीपी कप फुटबल प्रतियोगिता गर्ने भएको छ । 
पुष ११ देखि १६ गतेसम्म हेटौंडाको हुप्रचौरमा प्रथम वीपी कप फुटबल प्रतियोगिता आयोजना गर्न लागेको खेलकुद संघले शुक्रबार पत्रकार सम्मेलन गरी जानकारी दिएको हो । प्रतियोगितामा सहभागी हुने खेलाडी कांग्रेसको सदस्य हुनुपर्ने अनिवार्यता गरिएको छ ।
प्रतियोगितामा हेटौंडा उपमहानगरपालिकाका १९ वटा वडा, ८ गाउँपालिका र थाहा नगरपालिकाको एक टिमको सहभागिता रहनेछ । कांग्रेससंग आस्था राख्ने खेलाडीहरुलाई सक्रिय बनाउने र भ्रातृत्वको सम्बन्ध स्थापित गराउने उद्देश्यले फुटबल आयोजना गर्न लागेको अध्यक्ष सविन भट्टाचार्यले जानकारी दिए । 
हेटौंडा नगर बाहेकका टिम सदस्यहरुलाई खान र बस्नको व्यवस्था आयोजकले नै गर्ने जनाइएको छ । 
प्रतियोगिताको विजेताले नगद ५० हजार सहित ५० तोलाको चाँदिको शिल्ड प्रदान गरिने छ । शिल्ड भने रनिङ शिल्डको रुपमा रहने छ । यस्तै उपविजेता टिमले २५ हजार रुपैंयासहित ट्रफी, मेडल र प्रमाणपत्र प्राप्त गर्नेछ भने विधागत उत्कृष्ट खेलाडी एवम् कोचलाई जनही दुईहजार पाँचसय रुपैयाँसहित ट्रफी र प्रमाणपत्र प्राप्त गरिने अध्यक्ष भट्टाचार्यले बताए ।
प्रतियोगिताको लागि करिब १४ लाख रुपैंया खर्च लाग्ने र सहयोगीबाट उक्त रकम संकलन गरिने आयोजक लोकतान्त्रिक खेलकुद संघका उपाध्यक्ष युवराज लामाले जानकारी दिए । 
पत्रकार सम्मेलनमा कांग्रेस जिल्ला सदस्य एवम् खेलकुद विभाग संयोजक सुनिल दाहाल, टे«ड युनियन कांग्रेस मकवानपुर उपाध्यक्ष सर्मिला श्रेष्ठ, तरुण दल मकवानपुर सचिव सचित थापा, लोकतान्त्रिक खेलकुद संघ सचिव प्रदिप कंडेललगायतको आतिथ्यता थियो ।