शहिद स्मारक ए डिभिजन लिगः मनाङ र संकटा विजयी

१५ मंसिर, हेटौँडा । मिडफिल्डर अन्जन विष्टले र विदेशी खेलाडी ओलावले आफिजले १–१ गोल गरेपछि सहिद स्मारक ए डिभिजन लिगमा मनाङ मर्स्याङ्दी क्लबले सरस्वती युवा क्लबलाई २–० ले पराजित गरेको छ । 
यो जितसँगै मनाङले शीर्षस्थानमा ३ अंकको अग्रता बनाएको छ । गोलरहित पहिलो हाफपछि मनाङले अन्जनको गोलमा अग्रता लिएको थियो । अन्जनले ५५ औं मिनेटमा पेनाल्टी क्षेत्रको ठिक बाहिरबाट उत्कृष्ट गोल गरेका थिए । विमल रानामगरले बलमा नियन्त्रण गुमाएपछि छुटेको बलमा अन्जनले भली प्रहार गरेका थिए । 
यस्तै ओलावाले आफिजले ७८ औं मिनेटमा मनाङको अग्रता दोब्बर पारे । विमल राना मगरको लामो पासलाई पहिलो टचमा नियन्त्रण गर्दै आफिजले दोस्रो टचमा उत्कृष्ट फिनिस गरेका हुन । 
यस जितसँगै मनाङले शीर्ष स्थानमा ३ अंकको अग्रता कायम गरेको छ । शत प्रतिशत जित दर्ता गरेको मनाङको ५ खेलमा १५ अंक छ । मनाङलाई रुस्लान थ्री स्टार र संकटाले १२ अंक जोड्दै पछ्याइरहेका छन् । सरस्वतीले भने ५ खेलमा ६ अंक हासिल गरेको छ । 
यस अघि शनिवार नै भएको पहिलो खेलमा संकटा क्लबले च्यासल युथ क्लबमाथी २–१ को जित निकालेको छ । हल्चोकस्थित सशस्त्र प्रहरी बलको खेलमैदानमा भएको खेलमा संकटाको जितका पेनाल्टी मार्फत अमित तामाङ  र विदेशी खेलाडी एलोन म्याक्सवेलले गोल गरे । 
यस्तै च्यासलको तर्फबाट एक मात्र गोल सन्तोष साहुखलले गरे । जितसँगै संकटा लिग तालिकाको तेस्रो स्थानमा उक्लिएको छ । 
संकटाले पाँच खेलमा १२ अंक जोड्न सफल भएको छ । च्यासल भने पाँच खेलमा तीन हार, एक जित र एक बराबरीसहित ४ अंकमै सीमित छ ।