अम्बासगढि विकास लागि बकैयाको २५ लाख बजेट

१७ मंसिर, हेटौँडा । बकैयाको पर्यटकीय स्थल अम्बासगढिको पूर्वाधार विकासका लागि बकैया गाउँपालिकाले चालु आर्थिक बर्षमा २५ लाख रुपैँया बजेट विनियोजन गरेको छ । बकैया गाउँपालिका वडा नम्बर १० मन्थलीमा रहेको पुरातात्विक महत्वको पर्यटकीय क्षेत्र अम्बासगढिको विकास र प्रवद्र्धनका लागि चालु आर्थिक बर्ष ०७५/७६ मा गाउँपालिकाले २५ लाख रुपैँया खर्च गर्ने भएको हो ।

विनियोजित बजेटबाट अम्बासगढिको पर्यटकीय विकासका लागि गुरुयोजना र पूर्वाधार निर्माण गरिने गाउँपालिका अध्यक्ष दामोदर खनालले बताए । ‘धेरैलाई यो गढिको बारेमा जानकारी नभएकाले यसको प्रचारप्रसार र पूर्वाधार विकासको खाँचो देखेका छौं’–उनले भने–‘चालु आर्थिक बर्षमा गुरुयोजना र पूर्वाधार विकासमा जोड दिनेछौं ।’  मकवानपुरमा रहेको मकवानपुरगढी र चिसापानी गढिको मात्रै चर्चा भएको र अम्बासगढी भने ओझेलमा परेको स्थानीयको भनाई छ । यसको प्रचारप्रसार र पूर्वाधार विकास गर्न सके राम्रो पर्यटकीय गन्तव्य बन्न सक्ने स्थानीय सिमोन आलेमगरले बताए । ‘पहिला त गाउँलेहरुले मात्रै चासो लिएका थियौं तर अहिले गाउँपालिकाले नै चासो लिएर बजेट विनियोजन गरेकाले यसको विकास हुनेमा हामी विश्वस्त छौं ।’–उनले भने । 

बकैया गाउँपालिकाको हात्तिसुँडेबाट १५ किलोमिटर उत्तरमा ठिंगन र ललितपुरको नजिक रहेको अम्बासगढी मकवानपुर र काठमाडौं उपत्यकाका पर्यटकका लागि उपयुक्त गन्तव्य हुन सक्ने स्थानीयको भनाई छ । त्यहाँ रहेको बकैया ठाकुर मन्दिर र कालेश्वर मन्दिरमा बर्षेनी जात्रा लाग्ने गरेको छ । धार्मिक एवं पुरातात्विक दृष्टिकोणले महत्वपूर्ण देखिएकाले अम्बास गढि र यस क्षेत्रको पूर्वाधार विकासमा बजेट विनियोजन भएको बकैया गाउँपालिकाका प्रमुख प्रशासकीय अधिकृत खेमराज सापकोटाले जानकारी दिए । ‘विगतमा ओझेलमा पर्दा यसको विकासमा चासो नरहेको देखेपछि गाउँपालिकाले बजेट विनियोजन गरेर प्रवद्र्धनको काम थालेको छ ।’–उनले भने ।

यो क्षेत्रको विकासका लागि निरन्तर बजेट विनियोजन गरी यसलाई मकवानपुरकै प्रमुख पर्यटकीय गन्तव्यको रुपमा स्थापित गर्ने गाउँपालिकाको लक्ष्य रहेको छ । स्थानीयले पनि गढि क्षेत्रको सरसफाई र भएका संरचना संरक्षणको काम थालेका छन् । स्थानीय सरकार मात्रै नभई प्रदेश र संघीय सरकारले यसको विकासमा चासो दिनुपर्ने स्थानीयको माग छ ।