प्रदेश नम्बर ३ को राजधानी प्रक्रियाबाटै टुंग्याउने

१७ मंसिर, हेटौँडा । प्रदेश नम्बर ३ को स्थायी राजधानीको टुंगो प्रक्रियाबाटै लगाईने भएको छ । राजधानीबारे सहमति जुटाउन प्रदेशसभामा रहेका दलहरुको सोमबार बसेको बैठकमा सर्वसम्मत रुपमा एउटा जिल्लाको नाममा सहमति नजुटेपछि यसलाई प्रक्रियाबाटै टुंगो लगाउने तयारी अघि बढेको हो ।

प्रदेशसभाका सभामुख सानुकुमार श्रेष्ठको कार्यकक्षमा बसेको प्रदेशसभामा रहेका दलका नेताहरुबीच भएको छलफलमा सहमतीय प्रक्रियाबाट अघि बढ्नेमा टुंगो लाग्न नसकेको एक नेताले बताए । मूख्यमन्त्री डोरमणी पौडेलसहितको छलफलमा राजधानीबारेको प्रतिवेदनलाई कसरी प्रदेशसभा बैठकमा अघि बढाउने बारेमा छलफल भएको थियो । छलफलमा अधिकांशले प्रतिवेदनमा उल्लेख भएका जिल्लाहरुबारे निर्णय गर्न प्रदेशसभाको अधिकार उपयोग गर्नुपर्ने धारणा राखेका थिए । राजधानीबारे मकवानपुरप्रति सकारात्मक धारणा प्रदेशसभा सदस्यहरुको रहेपनि मतदान प्रक्रियाबाटै टुंगो लगाउनुपर्नेमा अधिकांशको जोड रहेको थियो ।

सहमति नजुट्ने भएपछि पुस ८ गते बस्ने प्रदेशसभा बैठकले राजधानी र नामको टुंगो लगाउने भएको छ । राजधानी अध्ययन विशेष समितिले असोज २२ गते प्रदेशसभा बैठकमा बुझाएको प्रतिवेदनमा बर्णानुक्रम अनुसार काभ्रे, चितवन, नुवाकोट, भक्तपुर र मकवानपुरलाई उपयुक्तताका आधारमा स्थायी राजधानीका लागि सिफारिस गरेको थियो ।