धर्म परिवर्तन गराउने संस्थाबाट प्रधानमन्त्रीले पुरस्कार लिनु गलत : कमल थापा

१८ मंसिर, हेटौँडा । राष्ट्रिय प्रजातन्त्र पार्टीका केन्द्रीय अध्यक्ष कमल थापाले सरकारको गलत कार्यशैलीका कारण नेपाल असफल राष्ट्र बन्ने खतरा रहेको बताएका छन् ।
राष्ट्रिय प्रजतान्त्र पार्टीले मंगलबार हेटौँडामा गरेको अगुवा कार्यकर्ता भेलामा बोल्दै अध्यक्ष थापाले सरकारको वर्तमान कार्यशैली गलत भएको र यसले देशलाई असफल राष्ट्र बन्नेतर्फ धकेलिरहेको बताए । पूर्व उपप्रधानमन्त्री समेत रहेका थापाले सरकार अपराध नियन्त्रण, सुशासन कायम गर्न र राष्ट्रिय पहिचान स्थापित गर्न असफल भएको बताए । धर्म निरपेक्ष राष्ट्रको प्रधानमन्त्री नै धर्म परिवर्तन गराउने संस्थाको कार्यक्रममा संलग्न भई पुरस्कार लिनु आपत्तिजनक भएको उनको भनाई थियो । यस्तो कार्यले राष्ट्रिय पहिचान र नेपालीको सम्मानमा ठेस पुगेको थापाले बताए ।
उनले राप्रपा प्राविधिक कारणले चुनावमा हारेपनि पार्टीको विचार दिनप्रतिदिन स्थापित हुँदै गएको दावि गरे । पशुपति सम्शेर राणा र प्रकाशचन्द्र लोहनी पार्टी एकिकरणको बाधक रहेको भन्दै उनले अब आफु एकिकरणका लागि कुरेर नबसी अभियानमा अघि बढ्ने बताए । उनले अब राप्रपाले हिन्दु राष्ट्रका लागि देशभर आन्दोलन थाल्ने भएकाले तयार रहन कार्यकर्तालाई निर्देशन दिए ।
कार्यक्रममा राप्रपाका सहायक महामन्त्री राजाराम वर्तौला, जिल्ला उपाध्यक्ष शिवराम थापा, सचिव केदार चौलागाई, १ नम्बर क्षेत्रीय अध्यक्ष राजाराम अर्याल, हेटौँडा नगर अध्यष गुरुप्रसाद सापकोटा, जिल्ला नेतृ इन्दिरा न्यौपाने, गढि अध्यक्ष कृष्ण विडारी, राष्ट्रिय प्रजातान्त्रिक युवक संगठनका शुक्र प्रजा लगायतले मन्तव्य व्यक्त गरेका थिए । कार्यक्रममा पार्टीका २ जना ज्येष्ठ कार्यकर्तालाई सम्मान गरिएको थियो । कार्यक्रम जिल्ला अध्यक्ष मधु अधिकारीको सभाध्यक्षतामा भएको थियो ।