सहिद स्मारक ’ए’ डिभिजन लिगः हिमालयनलाई हराउँदै संकटा दोश्रो स्थानमा उक्लियो

२७ मंसिर, हेटौँडा । काठमाडौँमा जारी सहिद स्मारक ए डिभिजन लिग फुटबल प्रतियोगिता अन्तर्गत विहिकार ३ खेल सम्पन्न भएका छन् । विहिबारको खेलमा संकटा क्लब, सरस्वती युथ क्लब र जावलाखेल विजयी भए । 
विहिबार संकटा र हिमालयन शेर्पा क्लब विच भएको खेलमा संकटा विजयी भएको छ । यो जितसँगै संकटा लिगको दोश्रो स्थानमा उक्लिएको छ । संकटाले हिमालयन शेर्पा क्लबलाई २–० गोल अन्तरले हराएको हो  । 
एन्फा कम्प्लेक्स सातदोबाटोमा भएको खेलमा संकटालाई जित दिलाउन विदेशी खेलाडी सेड्रिक अबा र दिपेश आले मगरले एक एक गोल गरे ।
जितसंगै संकटाले ८ खेलबाट २१ अंक जोडेको छ । सातौं जित निकालेसंगै संकटाले शीर्ष स्थानको मनाङ मर्स्याङ्दीसंग अंक बराबरी गरेको छ । हिमालयन शेर्पा ८ खेलबाट ११ अंक जोडेर छैटौं स्थानमा छ । 
यस्तै विहिबारनै भएको भएको अर्को खेलमा सरस्वती युथ क्लबले सहिद स्मारक ’ए’ डिभिजन लिग फुटबलमा तेस्रो जित दर्ता गरेको छ । बिहिबार भएको खेलमा सरस्वतीले  न्युरोड टिम एनआरटीलाई १ – ० गोल अन्तरले पराजित गरेको हो ।
एन्फा कम्प्लेक्स सातदोबाटोमा भएको खलमा सरस्वतीलाई जित दिलाउन भिक्टोर एमओबीले पेनाल्टीमा निर्णायक गोल गरे । पहिलो हाफ गोलरहित बराबरीमा सकिएको खेलको दोस्रो हाफमा भिक्टोरले ७३ औं मिनेटमा गोल गर्दै सरस्वतीलाई ३ अंक दिलाएका हुन् ।
जितसंगै सरस्वतीले ८ खेलबाट ९ अंक जोडेको छ । सरस्वती लिगको नवौं स्थानमा छ भने ८ खेलमा १ अंक जोडेको एनआरटी लिगको पुछारमा छ । 
यसैगरी हल्चोकस्थित एपीएफ मैदानमा बिहिबार नै भएको खेलमा भने जावलाखेलले एपीएफलाई १ – ० गोल अन्तरले पराजित गरेको छ । हल्चोकस्थित एपीएफ मैदानमा जावलाखेललाई जित दिलाउन विदेशी खेलाडी ओलालेकन आफिज लावलले निर्णायक गोल गरे । 
पहिलो हाफ गोलरहित बराबरीमा सकिएको खेलको ५९ औं मिनेटमा लावलले फ्रिकिकबाट गोल गर्दै जावलाखेललाई जित दिलाएका हुन्  । 
जितसंगै जावलाखेलले ८ खेलबाट ७ अंक जोडेको छ ।  जावलाखेल लिगको दशौ स्थानमा उक्लिएको छ ।  एपीएफ ८ खेलबाट १० अंक जोडेर आठौं स्थानमा छ ।