ए डिभिजन लिगः दशौँ चरणमा एनआरटी र मच्छिन्द्रको पहिलो जित

७ पुष, हेटौँडा । काठमाडौँमा जारी शहिद स्मारक ए डिभिजन फुटबल प्रतियोगिता अन्तर्गत शुक्रबारबाट सुरु भएको दशौँ चराणको खेलबाट न्युरोड टिम एनआरटी र मच्छिन्द्रले पहिलो जित निकालेका छन् । 
शुक्रबार भएको अर्को खेलमा न्युरोड टिम एनआरटीले ए डिभिजन लिग फुटबलमा पहिलो जित निकाल्ने क्रममा जावलाखेल युथ क्लबलाई २–१ गोल अन्तरले पराजित गरेको हो । 
हल्चोकस्थित एपीएफ मैदानमा एनआरटीलाई जित दिलाउन इस्माइ यौबुए र सुशील लामाले एक एक गोल गरे । जवालाखेलका सुमन डंगोलले एक गोल फर्काए । 
जावलाखेलसंगको जितसंगै एनआरटीले १० खेलबाट ४ अंक जोडेको छ । एनआरटी अझै लिगको पुछारमा छ । पराजित जावलाखेलको ८ अंक छ । जावलाखेल दशौं स्थानमा छ ।
यस्तै शुक्रबारनै भएको अर्को खेलमा मछिन्द्र फुटबल क्लबले पनि पहिलो जित निकालेको छ । सरस्वती युथ क्लबलाई ४–२ गोल अन्तरले पराजित गर्दै मछिन्द्रले पहिलो जित निकालेको हो ।
एन्फा कम्प्लेक्स सातदोबाटोमा मछिन्द्रलाई जित दिलाउन कप्तान विशाल राई, भसाडिया डियामान्डे, अनिल गुरुङ र विकास राईले एक एक गोल गरे  । 
सरस्वतीका फ्रान्सिस ओन्यामाले एक गोल फर्काउदा एक गोल आत्मघाती उपहार पाएको थियो ।
पहिलो जितसंगै मछिन्द्रले १० खेलबाट ६ अंक जोड्दै ११ औं स्थानमा उक्लिएको छ । सरस्वतीले १० खेलबाट १० अंक जोडेको छ  ।
यस्तै शुक्रबारकै अर्को खेलमा रहेको फ्रेन्ड्स क्लबले हिमालयन शेर्पा क्लबलाई पराजित गरेको छ । फ्रेन्ड्सले १० खेलाडीमा सिमित हिमालयन शेर्पालाई २–१ गोल अन्तरले हराएको हो । 
एन्फा कम्प्लेक्स सातदोबाटोमा फ्रेन्ड्सलाई जित दिलाउन संजोक महर्जन र जीवन गुरुङले एक एक गोल गरे । हिमालयन शेर्पाका गोहा प्याट्रिकले एक गोल गरे ।
जितसंगै फ्रेन्ड्सले १० खेलबाट ८ अंक जोड्दै तालिकाको ११ औं स्थानमा उक्लिएको छ । पराजित हिमालयन १४ अंक जोडेर लिगको छैटौं स्थानमा छ ।