सहिद स्मारक ‘ए’ डिभिजन लिगः दुई खेल बाँकी छँदै मनाङ् बन्यो च्याम्पियन

१२ पुष, हेटौँडा । मनाङ–मर्स्याङ्दी क्लबले दुई खेलअगावै राजधानीमा जारी सहिद स्मारक ‘ए’ डिभिजन लिग फुटबलको उपाधि जितेको छ ।
११ औँ चरण अन्तर्गत बिहीबार एन्फा मैदान सातदोबाटोमा भएको अर्को दावेदार टिम संकटा क्लबलाई ३–१ गोलअन्तरले पराजित गर्दै मनाङले उपाधि पक्का गरेको हो । यो सँगै मनाङ आठौंपटक लिग च्याम्पियन बन्न सफल भएको छ ।
मनाङले खेलेका सबै ११ खेल जित्दै ३३ अंकका साथ लिग जितेको हो । दोस्रो स्थानको संकटाको ११ खेलबाट २५ अङक छ । अब बाँकी रहेका दुवै खेल हारेपनि मनाङ च्याम्पियन बन्नेछ ।
विहीबारको खेलमा मनाङलाई जित दिलाउन विशाल राई, पुजन उपरकोटी र एडिलाजा सोमिडेले १/१ गोल गरे भने संकटाका लागी एक मात्र गोल सेड्रिक अबाले गरे । 
मनाङले यसअघि २०४२/२०४३, २०४३/२०४४, २०४६, २०५७, २०६०, २०६२ र २०७० गरी सातपटक उपाधि जितिसकेको छ ।
जारी लिगमा मनाङले पहिलो खेलमा ब्रिगेड ब्वाइज क्लबविरुद्ध ३–१, दोस्रोमा एनआरटीविरुद्ध २–०, तेस्रोमा थ्रीस्टारविरुद्ध २–१, चौथोमा एपीएफविरुद्ध २–१, पाँचौंमा सरस्वती युथविरुद्ध २–०, छैटौंमा जावलाखेल युथविरुद्ध १–०, सातौंमा मच्छिन्द्रविरुद्ध १–०, आठौंमा त्रिभुवन आर्मीविरुद्ध १–०, नवौंमा च्यासल युथविरुद्ध ३–१, दशौं चरणमा नेपाल पुलिसविरुद्ध १–० र एघारौं चरणमा संकटाविरुद्ध ३–१ को जित निकाल्दै उपाधिमाथि कब्जा जमाएको हो ।
मनाङले अब १२औं चरणमा हिमालयन शेर्पा तथा अन्तिम चरणमा फ्रेन्ड्स क्लबविरुद्ध खेल्नेछ ।
लिगको उपाधिसँगै मनाङले रु ५० लाख रुपैँया पुरस्कार पक्का गरेको छ ।
मनाङले उपाधि जितेसँगै जारी लिगमा उसका लागि फरवार्ड ओलावाले आफिजले ६ तथा अन्जन विष्टले ५ गोल गरेका छन् । मनाङले ११ खेलमा ५ गोल खाँदा २१ गोल गरेको छ ।