सभामुख श्रेष्ठमाथि खनिए प्रदेश नम्बर ३ का सदस्य

File Photo

१२ पुस, हेटौँडा । प्रदेश नम्बर ३ को प्रदेशसभा बैठकमा विहिबार प्रदेशसभा सदस्यहरु सभामुख सानुकुमार श्रेष्ठमाथि खनिएका छन् । उनीहरुले प्रदेशसभालाई कर्मकाण्डी ढंगबाट संचालन गरेको भन्दै आपत्ति जनाए । उनीहरुले सभामुखले शुन्य र विशेष समयको व्यवस्था भएपनि नराखेको भन्दै आक्रोश व्यक्त गरे ।
बैठकमा बोल्दै विवेकशिल साझा पार्टी र नेपाली कांग्रेसका प्रदेशसभा सदस्यहरुले शुन्य र विशेष समयको व्यवस्था नराखेको प्रति सभामुखको ध्यानाकर्षण गराएका थिए । बैठकमा बोल्दै विवेकशिल साझा पार्टीका प्रदेशसभा सदस्य रमेश पौड्यालले नागरिकको आवाज उठाउने स्थान संसद भएपनि यसलाई सभामुखले कर्मकाण्डी बनाएको बताए । यसबाट सत्तापक्ष मख्ख परेको भन्दै उनले नागरिकको जीवनसंग नजोडिएको संसद के संसद भन्दै गुनासो गरे । प्रदेश सरकारबाट इन्धनको अनियमितता भएको विषय बाहिर आएको भन्दै उनले भ्रष्टाचार र अनियमितताबारे कुरा उठाउने अवसरबाट बन्चित गर्न शुन्य र विशेष समय नराखिएको दावि गरे । 
त्यसैगरी, नेपाली कांग्रेसका प्रदेशसभा सदस्य प्रभात तामाङले प्रदेशसभा बैठक सांसदहरुका लागि मात्रै भएको बताए । प्रदेशमा भएका सामाजिक, आर्थिक र दैनिक समस्याबारे बोल्ने अवसरबाट बन्चित गरिएको उनको भनाई थियो । उनले प्रदेशका समस्यालाई संसदमा जानकारी गराउने व्यवस्थाका लागि सभामुखको ध्यानार्कषण गराएका थिए ।
विशेष र शुन्य समय नराखिएपछि केही प्रदेशसभा सदस्यहरुले विधेयकमाथिको सैद्धान्तिक छलफलका क्रममा आफ्ना धारणा राखेका थिए । नेकपाका प्रदेशसभा सदस्य बद्री मैनालीले विधेयकसंग सम्बन्धित विषय नभएपनि भन्दै नुवाकोटमा मिनि ट्रक दुर्घटनाका मृतकप्रति श्रद्धाञ्जली र परिवारजनमा समवेदना व्यक्त गरेका थिए । त्यस्तै, नेपाली कांग्रेसका प्रदेशसभा सदस्य छिरिङ दोर्जे लामाले प्रदेश राजधानीको निक्र्यौल विना उद्योग, कलकारखाना आउने सम्भावना नरहने भन्दै यसलाई यथाशिघ्र टुंगो लगाउन माग गरेका थिए ।
प्रदेश सभाको दोस्रो अर्थात बर्षे अधिवेशन अन्त्य हुनु अघि विशेष र शुन्य समयको व्यवस्था हुने अपेक्षा गरिएपनि सभामुख सानुकुमार श्रेष्ठले बुधबार र विहिबार बसेको बैठकमा विशेष र शुन्य समयको व्यवस्था रहेको जानकारी गराएका थिए ।