सरकारले हरेक निकायमा हस्तक्षेप गर्दैछ : देउवा

१६ पुस, काठमाडौं । नेपाली काङ्ग्रेसका सभापति शेरबहादुर देउवाले सरकारले हरेक निकायमा हस्तक्षेप गरिरहेको भन्दै आपत्ति जनाएका छन् । 
नेपाली कांग्रेस काठमाडौँले ४३ राष्ट्रिय एकता तथा मेलमिलाप दिवसका अवसरमा गरेको कार्यक्रममा बोल्दै उनले राज्यका हरेक निकायमा हस्तक्षेप गरेर सरकारले अनावश्यक काम गरेको बताए । उनले सेना, प्रहरीसहित कर्मचारीतन्त्रमा समेत अनावश्यक हस्तक्षेप गरेर पार्टीकरण गर्न खोजेको दावि गरे । कर्मचारी समायोजनका लागि यसको थालनी भएको भन्दै सेना र प्रहरी पनि नेकपाको हस्तक्षेपको शिकार हुने भन्दै आफुहरु चुप लागेर नबस्ने चेतावनी दिए । लोकतन्त्रका लागि विपिले मेलमिलापको नीति शुरु गरेको भन्दै आफुहरुले मेलमिलापको नीति लिएपनि नेकपा नेतृत्वको सरकारले गलत नीति लिएको देउवाको दावि थियो । 
कार्यक्रममा केन्द्रीय सदस्य नरहरि आचार्य, ध्यानगोविन्द रञ्जित, पूर्व सभामुख तारानाथ रानाभाट, काठमाडौँ काङ्ग्रेसका सभापति सबुज बानियाँ, प्रदेश सदस्य छिरिङदोर्जे लामा, नेपाल महिला सङ्घ काठमाडौँका अध्यक्ष विष्णुदेवी पुडासैनी, पार्टीका क्षेत्रीय सभापति मुकुन्द रिजाल, नेपाल विद्यार्थी सङ्घ काठमाडौँका अध्यक्ष मनोज वैद्यलगायतले मन्तव्य व्यक्त गरेका थिए ।