स्थानीयलाई सिप सिकाउँदै हेटौँडा वडा नम्बर १

१७ पुस, हेटौँडा । हेटौंडा उपमहानगरपालिका वडा नम्बर १ ले  व्यावसायिक तथा सीप विकास तालिम केन्द्र हेटौंडासंगको सहकार्यमा विद्युत् जडानसम्बन्धी तीन महिने तालिम मंगलबारदेखि हेटौंडामा शुरु गरेको छ ।
हेटौंडा–१ का २० जना युवाहरु सहभागी तालिम सुन्दर सामुदायिक वन उपभोक्ता समूहको सभाहलमा सुरु भएको हो । हेटौंडा–१ का अध्यक्ष सविन न्यौपानेको सभाध्यक्षता तथा केन्द्र प्रमुख युवराज गुरुङको प्रमुख आतिथ्यतामा तालिम उद्घाटन भएको हो । तालिम उद्घाटन गर्दै प्रमुख गुरुङले भविष्यमा स्वरोजगार हुने गरी तालिम ग्रहण गर्न अनुरोध गरे । विद्युत् तालिम जोखिमपूर्ण रहेकोले  विशेष ध्यान दिन पनि उनले सचेत गराएका थिए ।
कार्यक्रममा वडा सदस्यद्वय सोमलाल स्याङ्तान र ईश्वरी रसाइली, सुन्दर सावउस अध्यक्ष कमल लामा, प्रशिक्षक शम्भु आचार्य, चौकीटोल प्रहरी चौकीका ट्राफिक प्रहरी हवल्दार डोरहरि नेपाललगायतले शुभकामना मन्तव्य व्यक्त गरेका थिए । तालिममा हेटौंडा उपमहानगरपालिका वडा नं. १ लालझाडी, मैनटार, चौकीटोल, जरुवाटोल, चाइनाक्वार्टर क्षेत्रका युवाहरु सहभागी छन् । तालिममा तीन जना महिलासमेत सहभागी भएको वडा अध्यक्ष न्यौपानेले जानकारी दिए ।