उपमहानगरमा गाभ्न गढी गाविसको माग

११ कार्तिक, हेटौंडा । मकवानपुरगढी गाविसलाई हेटौंडा उपमहानगरपालिकामा गाभ्नुपर्ने त्यहाँको सर्वदलीय संयन्त्रले माग गरेको छ । सर्वदलीय संयन्त्र र स्थानीयसहितको टोलीले विहिबार जिविस मकवानपुरमा ज्ञापनपत्र बुझाउँदै स्थानीय निकाय पुनर्संरचनाको क्रममा गढीलाई उपमहानगरपालिकामा गाभ्न माग गरेको हो ।

मकवानपुरका स्थानीय विकास अधिकारी नारायणप्रसाद मैनालीलाई ज्ञापनपत्र बुझाउँदै सर्वदलीय संयन्त्रका प्रतिनिधिले अाफुहरूले २०७३ साउन ९ गते  उपमहानगरपालिका समावेश हुने निर्णय गरेको र स्थानीय निकाय पुनर्संरचना अायोग समेत केन्द्रमा सिफारिस गरेकाले सोही अनुसार कार्यान्वयन हुनुपर्ने माग गरेका छन् ।

ज्ञापनपत्रमा हेटौंडा गाउँ पञ्चायत हुँदा गढीका अधिकांश भाग गाउँ पञ्चायतमा रहेको, गाविसका १ देखि ९ नम्बर वडा उपमहानगरपालिकामा जोडिएको, गाविस र नगर क्षेत्र मा रहेका वन समूहमा द्वेध स्वामित्व रहेको, कान्तिलोकपथ, फाष्टट्रयाकसहित अन्य सडक पूर्वाधार तयार रहेको, मनकामना, मकवानपुर गढी, रूद्रबाटिका जस्ता एेतिहासिक धरोहर रहेको, गढी र हेटौंडा उपमहानगरपालिकाबीच भगिनीसम्बन्ध रहेको र उत्तरी क्षेत्रमा शिरदेखि पुच्छरसम्म सामरी खोलाले सिमाना छुट्याएकाले गढी गाविसलाई नगरमा गाभ्नु पर्ने माग गरिएको छ ।

ज्ञापनपत्र बुझ्दै स्थानीय विकास अधिकारी  मैनालीले जनता भावना अनुसार निर्णयका लागि जिविस तयार रहेको भन्दै जिल्लामा क्रियाशील राजनैतिक दललाई सहमत गराउन अाग्रह गरे । गढीका राजनैतिक संयन्त्र र स्थानीयले विहिबार नै नेपाली कांग्रेस, नेकपा एमाले, माअोवादी केन्द्र, राप्रपा नेपाल, राप्रपा, माले, संघिय समाजवादी फोरम र नयाँ शक्ति पार्टीलाई समेत मागबारे अवगत गराएको छ । 

पछिल्लो समय गढी, अामभञ्ज्याङ, सुकौरा र बुढीचौर गाविस समेटेर गाउँपालिका बनाउने विकल्प बारे छलफल हुन थालेकाले गाविसबासीले सरोकारवालाहरूलाई सचेत गराउन ज्ञापनपत्र बुझाएका हुन् ।