फापरबारीमा निःशुल्क आँखा परीक्षण शिविर

२० पुस, हेटौँडा । रोटरी क्लब अफ मिट टाउन काठमाडौं र रोटरी क्लब अफ मकवानपुरको आयोजनामा शुक्रबार बागमती गाउँपालिकास्थित फापरबारीको स्वास्थ्य चौकीमा निःशुल्क आँखा परीक्षण शिविर सम्पन्न भएको छ ।
निःशुल्क आँखा परीक्षण शिविरमा करिब दुईसयजनाले आँखा परीक्षण गराएका थिए । जसमध्ये ३१ जनामा मोतियाविन्दु भेटिएको छ । उनीहरुको  निःशुल्क अप्रेशसन समेत गरिनेछ । बरिष्ठ नेत्र सहायक सुशीलकुमार सिंहको नेतृत्वको पाँच सदस्यीय प्राविधिक टोलीले निःशुल्क आँखा परीक्षण गरेको थियो ।
सामुदायिक आँखा अस्पताल हेटौंडाको प्राविधिक सहयोगमा भएको निःशुल्क स्वास्थ्य परीक्षण आइतबारसम्म सञ्चालन हुनेछ । आज शनिबार पर्साको पका गाउँपालिका, मकवानपुर गढीको आँपटार र बाराको जयतापुरमा निःशुल्क आँखा परीक्षण शिविर हुने रोटरी क्लब अफ मकवानपुरका संस्थापक अध्यक्ष ज्ञानकृष्ण प्रजापतिले जानकारी दिए ।
आइतबार बाराको निजगढमा शिविर हुने र आवश्यक तयारी पूरा भएको रोटरी क्लब अफ मकवानपुर अध्यक्ष विजयलाल श्रेष्ठले जानकारी दिए । उनका अनुसार यस शिविरबाट दुईसय ५० जना मोतियाविन्दुका विरामीको क्लबले निःशुल्क अप्रेशनको व्यवस्था गरेको छ । क्लबले प्रत्येक वर्ष मकवानपुरसहित छिमेकी जिल्लाको विभिन्न स्थानमा निःशुल्क आँखा परीक्षण गर्ने गरेको छ ।