रानी सामुदायिक वनबाट ९ उपभोक्तालाई सम्मान

२२ पुस, हेटौँडा । हेटौडा–६, चौघडामा रहेको रानी सामुदायिक वन उपभोक्ता समूहको २५ औं वार्षिक उत्सव आईतवार सम्पन्न भएको छ । समूहले वार्षिकोत्सवको अवसरमा विभिन्न विधामा उत्कृष्ट काम गर्ने उपभोक्ताहरुलाई सम्मानित गरेको छ । समूहको स्वीकृत वार्षिक कार्यक्रम अनुसार सम्मानित गरेको समूहले जनाएको छ ।
समूहले हस्तकला तर्फ हेटौडा–६,कल्याणटारका रामचन्द्र राई,खेती तर्फ हेटौडा–६, शान्तिटोलका करुणा रिजाल, पशुपालनतर्फ नरेन्द्र लम्साल, सरसफाईतर्फ बासुदेव अधिकारीलाई सम्मानित गरिएको थियो । यसैगरी सरसफाई अभियन्तातर्फ श्यामप्रसाद श्रेष्ठ, ध्रुबप्रसाद अधिकारी, उत्कृष्ट उपभोक्तामा शत्रुघन दुलाल, रामहरी तिमल्सिना र कमलप्रसाद सुवेदीलाई सम्मानित गरिएको थियो ।
मकवानपुरगढी गाउँपालिका अध्यक्ष विदुर हुमागाईको प्रमुख आतिथ्यता एवम समूहका अध्यक्ष कृष्ण बिडारीको अध्यक्षतामा भएको वार्षिक उत्सव कार्यक्रममा मकवानपुर जिल्ला दुग्ध उत्पादक सहकारी संघका अध्यक्ष बासुदेव अधिकारी,हेटौडा–६ का वडा अध्यक्ष अर्जुनप्रसाद चौलागाई, मकवानपुरगढी–३ का वडा अध्यक्ष भागवत घिमिरे, चौघडा बचत तथा ऋण सहकारी संस्थाका अध्यक्ष श्यामप्रसाद श्रेष्ठ, भानु माविका अध्यक्ष खिलप्रसाद चौलागाई,समूहकी सचिव नानीमाया रुम्बा, कार्यालय सचिव भीमसेन पौडेल लगायतले मन्तव्य व्यक्त गरेका थिए ।