रेशम चौधरीलाई रिहा गर्न सर्वोच्चले गर्‍यो अस्वीकार 

२३ पुष, हेटौँडा । टीकापुर हत्याकाण्डको मुख्य योजनाकार मानिएका तथा कैलाली क्षेत्र नम्बर १ बाट निर्वाचित सांसद रेशम चौधरीले आफूलाई रिहा गर्न भन्दै गरेको माग सर्वोच्च अदालतले अस्वीकार गरेको छ । सर्वोच्चले उनलाई थुनामै बसेर मुद्दाको पुर्पक्ष गर्नुपर्ने गरी आदेश दिएको छ । 
सोमबार न्यायाधीश ईश्वर खतिवडा र पुरूषोत्तम भण्डारीको इजलासले मिसिलमा संलग्न प्राप्त प्रमाणबाट चौधरीले आरोपित कसुर गरेको भनि विश्वास गर्न सकिने पर्याप्त आधार विद्यमान रहेको देखिएकाले उनलाई ठहरे बमोजिम हुने गरी पूर्वपक्षका लागि थुनामा राख्ने कैलाली जिल्ला अदालतको आदेश मनासिब देखिएकोले परिवर्तन गरिरहनु नपर्ने भनि आदेश गरेको हो ।
जिल्ला अदालतले थुनामै बसेर मुद्दाको पूर्पक्ष गर्न भन्दै दिएको आदेश खारेज गर्न माग गर्दै चौधरीले सर्वोच्च अदालतमा निवेदन दिएका थिए । उनको माग सर्वोच्चले अस्वीकार गरेको हो ।
यसअघि चौधरीलाई जिल्ला अदालत कैलालीले पूर्पक्षका लागि थुनामा राख्न आदेश दिएको थियो । चौधरीले फागुन १४ गते अदालतमा आत्मसमर्पण गरेका थिए ।
एक वर्षअघि भएको संसदीय निर्वाचनमा कैलाली क्षेत्र नम्बर १ बाट निर्वाचित चौधरीले केही दिनअघि मात्र सांसदको सपथ लिएका थिए । 
२०७२ भदौ ७ गते टीकापुरमा थरुहट आन्दोलन हिंसात्मक बन्दा नेपाल प्रहरीका एसएसपी लक्ष्मण न्यौपानेसहित ७ जना प्रहरी र १ नाबालकको ज्यान गएको थियो । टीकापुर घटना गराएको अभियोगमा उनीविरूद्ध कर्तव्य ज्यान, ज्यान मार्ने उद्योग र डाँका चोरी मुद्दा दायर गरिएको छ ।