आँचलले साहित्यकार र पत्रकारलाई सम्मान गर्ने 

२३ पुस, हेटौँडा । मकवानपुरे महिला साहित्यकारहरुको संस्था आँचल साहित्य कला पुञ्जले यसवर्ष दुई जना साहित्यकार र एक जना पत्रकारलाई सम्मान गर्ने भएको छ ।
आँचलको वार्षिकोत्सव तथा तेस्रो अधिवेशनको अवसरमा साहित्य र पत्रकारिता मार्फत् समाजमा योगदान पुर्याउनेलाई सम्मान गर्ने निर्णय भएको संस्थाकी सचिव अनिता न्यौपानेले जानकारी दिइन् । यही पुस २८ गते हुने कार्यक्रममा साहित्यकार रुकु कार्की, बुनु लामिछाने र अग्रज पत्रकार कौशल पाण्डेलाई सम्मान गर्ने निर्णय भएको उनले बताइन् ।
आँचलले अघिल्लो वर्षबाट प्रदान गर्न थालेको बालकुमारी जगन्नाथ भेटवाल स्मृति सम्मान–२०७५ बाट साहित्यकार रुकु कार्कीलाई सम्मा गर्ने सचिव न्यौपानले जानकारी दिइन् । उनलाई सम्मानपत्रसहित नगद १० हजार प्रदान गरिने जनाइएको छ । उक्त सम्मान समाजसेवी हरिवंश भेटवालले मातापिताको सम्झनामा स्थापना गरेका हुन् । अघिल्लो वर्ष यो सम्मानबाट साहित्यकार प्रतिमा पाठक सम्मानित भएकी थिइन् । 
यसैगरी आँचलले यसवर्ष देखि स्थापना गरेको प्रतिभा तिवारी छन्द सम्मानबाट महाकाव्यकार बुनु लामिछानेलाई सम्मानित गरिने न्यौपानेले जानकारी दिइन् । उनका अनुसार यो सम्मानमा पनि सम्मानपत्रसहित नगद १० हजार प्रदान गरिने निर्णय भएको छ । साहित्यकार मुना अर्यालको संयोजनमा प्रतिभा तिवारी आफैंले सम्मान स्थापना गरेकी हुन् । 
यस्तै, आँचल साहित्य कला पुञ्जले इश्वर लम्साल स्मृति पत्रकारिता पुरस्कार–२०७५ बाट अग्रज पत्रकार कौशल पाण्डेलाई सम्मान गर्ने निर्णय गरेको छ । सम्मान पत्रसहित नगद ५ हजार ५ सय ५५ रुपैया प्रदान गरिने सचिव न्यौपानेले जानकारी दिइन् । उक्त सम्मान प्रकाश लम्साल र अप्सरा तिम्सिनाले पिता तथा ससुराको स्मृतिमा यसवर्ष स्थापना गरेका हुन् । अघिल्लो वर्ष पत्रकारिता पुरस्कारबाट पत्रकार ध्रुव अधिकारीलाई सम्मानित गरिएको थियो ।