कुलेखानी खतरायुक्त भयो, संरक्षण भएन : विडारी  

File Photo

२५ पुस, हेटौँडा ।  मकवानपुरको  ईन्द्रसरोवर गाउँपालिकामा रहेको नेपालकै सबैभन्दा ठूलो मानव निर्मित ताल कुलेखानी खतरायुक्त भएको भन्दै त्यसको संरक्षणका लागि  राष्ट्रिय सभामा आवाज उठेको छ ।
राष्ट्रिय सभा सदस्य रामनारायण विडारीले राष्ट्रिय सभामा बुधबार बोल्दै कुलेखानी खतरायुक्त भएको भन्दै त्यसको संरक्षणका लागि  सरकारसंग आग्रह गरेका हुन् । विडारीले तालमा माटो भरिँदै गएकोले ड्याम  खतरायुक्त बन्दै गएको भन्दै यसको संरक्षणमा ध्यान दिन सरकारलाई ध्यानाकर्षण गराएका हुन । 
उनले २०७२ को  भूकम्प पछि चर्किएको ड्याम फुट्दा तलका क्षेत्रमा ठूलो क्षति हुने भएकाले बेलैमा सचेत हुन सरकारको ध्यानाकर्षण गराए । विडारीले  बज्रबाराही, चित्लाङ, मार्फु भञ्ज्याङ, फाखेल, दामन, पालुङ, टिस्टुङ लगायतको क्षेत्र जलाधार क्षेत्र भएपनि यहाँको रुख विरुवा काटिएको र त्यहाँ भइरहेका निर्माण कार्यहरु, उत्खननका कार्यले तालको जलाधार क्षेत्र सुक्दै गएको बताउँदै विडारीले त्यसतर्फ संरक्षण गर्न नसकिएको आरोप लगाएका छन् । 
साथै उनले कञ्चनपुरकी बालिका निर्मला पन्तको बलात्कार र हत्या प्रकरणमा प्रमाण नष्ट गर्ने प्रहरीमाथि फौजदारी अभियोगमा किन कारवाही गरिएन भन्दै सरकारको ध्यानाकर्षण गराएका थिए ।