व्यवसायी हुसेन हत्यामा संलग्न ४ जना पक्राउ

Photo : ekantipur

२७ पुस, सुनसरी । सुनसरीका व्यवसायी फिदा हुसेनको हत्यामा संलग्न चार जनालाई प्रहरीले पक्राउ गरेको छ । 
दुहवी नगरपालिका ९ छाताबेलीका ब्यवसायी हुसेनको गोली हानी हत्या गर्ने समूहका चार जना अभियुक्तलाई प्रहरीले घटनाको ५१ औं दिनपछि पक्राउ गरी सार्वजनिक गरेको समाचार कान्तिपुरमा छ । 
व्यक्तिगत रिसइवी र आर्थिक लेनदेनमा भएको असमझदारीको कारण हुसेनको हत्या भएको प्रहरीले जनाएको छ । हत्याका मुख्य योजनाकार छाताबेलीका मोहमद शाकीम हुसेन, दुहवी १२ सीतापुरका विशम्बर यादव, छाताबेलीकै मोहमद जाबीर हुसैनलाई क्षेत्रीय अनुसन्धान ब्यूरो र सुनसरी प्रहरीको सक्रियतामा पक्राउ गगरी सार्वजनिक गरिएको हो । अर्का अभियुक्त छाताबेलीकै जफर मियालाई बाँके प्रहरीले पक्राउ गरी सुनसरी प्रहरीलाई बुझाउने जनाएको छ । 
प्रहरीले उनीहरुले प्रयोग गरेको कटुवा पेस्तोल खोका सहितको एक थान, गोली २ राउण्ड र चक्कु एकथान बरामद गरेको छ । घटनापछि दुहवी १२ मा रहेको लक्ष्मीनारायणको मन्दिर परिसरमा रहेको नरिवलको रुखमुनि खनेर हतियार लुकाएको अवस्थामा अभियुक्तको बयानका आधारमा प्रहरीले सो हतियार बरामद गरेको सुनसरीका एसपी राजन अधिकारीले जानकारी दिए ।
व्यवसायी हुसेनलाई मंसिर ५ गते बिहान सात बजे जयबाबा इँटा भट्टा जाने सुनसरी मोरङ सिंचाइ आयोजनाको शाखा नहरमा गोली हानिएको थियो । मोटरसाईकलमा आएका एक ब्यक्तिले हुसेनमाथि गोली प्रहार गरी भागेका थिए । उनको घटनास्थलमै मृत्यु भएको थियो । हत्याका अभियुक्त पक्राउ गर्नुपर्ने र मृतकलाई शहिद घोषणा गर्नु पर्ने माग राखि उनको शव नै सडकमा राखेर दुहवीबासीले आन्दोलन गरेका थिए ।