प्याव्सन मकवानपुरको अधिवेशन शनिबार

३ माघ, हेटौँडा । नीजि तथा आवासीय विद्यालय अर्गनाईजेशन नेपाल (प्याव्सन) मकवनपुरको सातौं जिल्ला अधिवेशन शनिबार हुने भएको छ । प्याव्सन मकवानपुरले विहिबार पत्रकार सम्मेलन गरी माघ ५ गते शनिबार सातौं अधिवेशन हुने जनाएको हो । 
अधिवेशनबारे जानकारी दिंदै जिल्ला अध्यक्ष मदन दाहालले अधिवेशनबाट नयाँ जिल्ला कार्यसमिति, प्रदेश अधिवेशन प्रतिनिधि र राष्ट्रिय महाधिवेशन प्रतिनिधि चयन गर्ने जानकारी दिए । उनले संघीय संरचनामा गईसकेपछि पहिलो पटक हेटौँडा नगर कमिटि समेत अधिवेशनबाट चयन हुने बताए । यसअघि मनहरी गाउँपालिकार थाहा नगरपालिकामा कमिटि गठन भईसकेको जनाईएको छ । 
हेटौँडाको क्लव हेटौँडामा हुने अधिवेशनको अवसरमा लामो समय शिक्षा क्षेत्रमा योगदान पुर्याएका विद्यालय संचालक, विद्यालय शिक्षक, कर्मचारी र शिक्षा क्षेत्रमा कलम चलाउने एक जना पत्रकारलाई सम्मान गर्ने प्याव्सनले जनाएको छ । यसैगरी, प्याव्सनको प्रदेश अधिवेशन माघ २५ गते हेटौँडामा हुने भएको छ । मकवानपुरमा रहेका ८२ संस्थागत विद्यालयमा ३५ हजार विद्यार्थीले अध्ययन गरिरहेका छन् भने ११ सय शिक्षकले अध्यापन गरिरहेका छन् । मकवानपुरमा संस्थागत विद्यालयमा २ अर्ब भन्दा बढि लगानी रहेको प्याव्सनको दावि छ ।
पत्रकार सम्मेलनमा प्याव्सनका केन्द्रीय उपाध्यक्ष आशिष श्रेष्ठ, प्रदेश उपाध्यक्ष केशवलाल श्रेष्ठसहित जिल्ला कार्यसमितिका प्रदाधिकारी एवं सदस्यहरुको सहभागिता रहेको थियो ।