मैयादेवीले गरीन मानवसेवा आश्रमलाई २० करोड बराबरको जग्गादान

मानवसेवा आश्रम भरतपुरको गृहारम्म कार्यक्रममा जग्गादाता मैयादेवी श्रेष्ठ। फोटोः मानवसेवा आश्रम

७ माघ, चितवन । मानवसेवा आश्रम भरतपुर शाखाको भवन निर्माणका लागि २० करोड बराबरको जग्गादान  गरिएको छ । स्व. भगवानदास श्रेष्ठ, प्रेम कुमार श्रेष्ठ एवं श्रेष्ठ परिवारको तर्फबाट भरतपुर–३ बेलचोकमा रहेको आठ कठ्ठा जग्गा आश्रमलाई दान गरेको हो । 
सोमबार एक समारोहका बिच प्रदेश नम्बर ३ का सामाजिक विकास मन्त्री युवराज दुलालको उपस्थितिमा उक्त जग्गा मानवसेवा आश्रम चितवन शाखालाई उपलब्ध गराईएको छ । 
मानवसेवा आश्रम चितवन शाखाको भवननिर्माणकार्यको गृहारम्म कार्यक्रममा बोल्दै  ३ नम्बर प्रदेश सरकारका  सामाजिक विकास मन्त्री युवराज दुलालज्यूले मानवसेवा आश्रम चितवन शाखाको भवन निर्माणको लागि ३ नम्बर प्रदेश सरकारको सहयोग रहने बताउनुभएको छ । 
त्यसैगरी कार्यक्रममा बोल्दै स्व. भगवानदास श्रेष्ठकी दिदी मैयादेवी श्रेष्ठले कसैले पनि मरेर जाँदा केही लिएर नजाने भन्दै आश्रमको कार्यले सार्थकता पाओस भन्दै भन्दै खुशी व्यक्त गरीन ।मानवसेवा आश्रमका प्रमुख संरक्षक डा.गोविन्द टण्डनको सभाध्यक्षतामा भएको कार्यक्रममा आश्रमका केन्द्रीय संस्थापक अध्यक्ष रामजी अधिकारी ,प्रदेशसभा सदस्य माननीय विजय सुवेदी, जिल्ला समन्वय समितिका सभापति कृष्ण कुमार ढल्लाकोटी, स्व. भगवानदास श्रेष्ठज्यूको धर्मपत्नी कल्याणी श्रेष्ठ, भरतपुर उपमहानगरपालिकाका उपप्रमुख पार्वती शाह ठकुरी, प्रमुख जिल्ला अधिकारी जीतेन्द्र बस्नेत, प्रमुख प्रशासकिय अधिकृत नेत्र आचार्य, उद्योग बाणिज्य संघ चितवनका अध्यक्ष सहन प्रधान, भरतपुर अस्पतालका मेसु डा. कृष्ण पौडेल,नारायणगढ फलफुल तथा थोक तरकारी व्यवसायी संघका अध्यक्ष कृष्ण कडेंल, समाजसेवी प्रभात कुमार जोशी, महेन्द्रलाल प्रधान, स्थानिय वडा अध्यक्ष चन्द्र मित्र पण्डीत, लगाएतकाको उपस्थिती रहेको थियो।