हेटौँडामा ७ हजार तरुण सरकार विरुद्ध उत्रने

८माघ, हेटौँडा । नेपाली काँग्रेस निकट भातृ संगठन नेपाल तरुण दलले सरकारविरुद्ध ७ वटै प्रदेशको राजधानिमा गरिने सरकार विरुद्धको विरोध प्रदर्शनको कार्यक्रमको तयारी हेटौँडामा पनि लगभग पुरा भएको छ । प्रदेश नम्बर ३ को राजधानि हेटौँडामा १० गते बहिबार गर्ने विरोध कार्यक्रमको तयारी लगभग पुरा भएको जनाइएको हो  । 
तरुण दल मकवानपुरले मंगलबार हेटौँडामा पत्रकार सम्मेलनको आयोजना गर्दै तयारी लगभग पुरा भएको जनाएको हो । 
पत्रकार सम्मेलनमा तरुण दल मकवानपुरका अध्यक्ष ईश्वर पाठकले वर्तमान ओलि सरकारले अधिनायकवादी चरित्र प्रदर्शन गरेको भन्दै माघ १० गते हेटौंडाको विभिन्न स्थानमा करिब ७ हजार जना युवाहरुले सरकार विरुद्ध प्रदर्शन र कोणसभा गर्ने बताएका छन ।
उनले कम्युनिष्ट सरकारको अधिनायकवादी चरित्र, भ्रष्टाचार, महंगी, मुल्यवृद्धी, वाइडबडी खरिद अनियमितता, निर्मला पन्त लगायतका गैरकानुनी र अलोकतान्त्रिक रबैयाको विरोधमा सातै प्रदेशको राजधानीमा विरोध प्रदर्शन कार्यक्रमको आयोजना गरिएकोमा हेटौंडामा पनि सरकारविरुद्ध विरोध प्रर्दशन  गरिने पाठकले बताए ।
माघ १० गते हुने विरोध प्रदर्शनमा तरुण दलका केन्द्रीय अध्यक्ष जीतजंग बस्नेत, उपाध्यक्ष उत्तम चापागाईं, महासचिव भुपेन्द्र जंग शाही, कोषाध्यक्ष विद्धान गुरुङलगायत पार्टीका केन्द्रीय तथा जिल्ला नेताहरुको सहभागिता हुने पत्रकार सम्मेलनमा बताइएको छ । 
 विरोध जुलुस १० गते दिउँसो १२ बजे पार्टी कार्यालय हेटौंडा–२ बाट सुरु भई काँग्रेसचोक, उद्योगवाणिज्य संघ चोक, वुद्धचोक, चौघडा टेम्पो पार्क चोक, स्कुलरोड हुँदै सीमाचोक टिसिएन रोड, बसपार्क , राप्तीरोड हुँदै वुद्धचोकमा आएर कोणसभामा परिणत हुने अध्यक्ष पाठकले बताए ।