बकैयास्तरीय फुटबलमा वडा नम्बर ५ विजयी

हेटौँडा, १७ माघ । बकैया गाउँपालिकामा विहिबारबाट शुरु भएको प्रथम बकैया गाउँपालिकास्तरीय रनिङ शिल्ड फुटबल प्रतियोगितामा वडा नम्बर ५ ले विजयी शुरुवात गरेको छ ।  
उद्घाटन खेलमा वडा नंबर २ लाई ट्राइब्रेकरमा ३–२ गोलअन्तरले पराजित गर्दै वडा नम्बर ५ ले विजयी सुरुवात गरेको हो । जुरेली खेल मैदानमा भएको प्रतियोगिताको शुभारम्भ गर्दै प्रदेश नंबर ३ का आन्तरिक मामिला तथा कानुन मन्त्री शालिकराम जम्मरकट्ेलले गाउँगाउँमा खेलकुदको क्रियालाप हुनु राम्रो भएको बताए । 
खेलले देशलाई अन्तराष्ट्रिय क्षेत्रमा चिनाउनको लागि निकै महत्वपूर्ण भूमिका खेल्ने भन्दै उनले बकैयाको खेलकुद क्षेत्रको विकासको लागि प्रदेश नंबर ३ को सरकारले महत्वपूर्ण भूमिका खेल्ने बताए । 
बकैया गाउँपालिका खेलकुद विकास समन्वय समितिका अध्यक्ष प्रकाश वाईवाको अध्यक्षतामा भएको कार्यक्रममा प्रदेश नंबर ३ का सांसद प्रेमबहादुर पुलामी, बकैया गाउँपालिका अध्यक्ष दामोदर खनाल, उपाध्यक्ष सरला बोलखे, जिल्ला खेलकुद विकास समिति  अध्यक्ष माधव तिमल्सीना, मकवानपुर जिल्ला फुटबल संघका अध्यक्ष टिकाराम लामा सहितका गाउँपालिकाका वडा अध्यक्षहरु तथा विभिन्न राजनीतिक दलका नेताहरुको सहभागिता रहेको थियो । 
प्रतियोगितामा बकैया गाउँपालिकाका १२ वटा वडाहरुको सहभागिता रहेको छ । प्रतियोगिताको विजेताले नगद ७५ हजार, शिल्ड, मेडल तथा प्रमाणपत्र, उपविजेताले नगद ५० हजार सहित शिल्ड, मेडल तथा प्रमाणपत्र र तृतिय स्थान हुनेले नगद २५ हजार सहित शिल्ड, मेडल तथा प्रमाणपत्र प्राप्त गर्ने आयोजक समन्वय समितिका सचिव यादव चौँलागाईले बताए ।