बानियाँले सोधे–राजधानी तोक्न के ले रोक्यो ? (भिडियोसहित)

१८ माघ, हेटौँडा । प्रदेश नम्बर ३ को प्रमुख प्रतिपक्षी दल नेपाली कांग्रेस संसदीय दलका नेता ईन्द्रबहादुर बानियाँले यथाशिघ्र राजधानी तोक्न सचेत गराएका छन् । 
प्रदेशसभाको प्रथम बार्षिकोत्सवको अवसरमा शुक्रबार प्रदेशसभा परिसर हेटौँडामा भएको कार्यक्रममा बोल्दै नेता बानियाँले दुई तिहाई भएको पार्टी नेतृत्वको सरकारलाई प्रदेशको राजधानी तोक्न र नामाकरण गर्न के ले रोक्यो भनि प्रश्न गरेका छन् । राजधानी अध्ययन समितिले प्रतिवेदन बुझाएको ५ महिना भईसक्दा पनि यसबारे निर्णय नगरेको भन्दै उनले प्रदेशसभाको हिउँदे अधिवेशन एक हप्ताभित्र राख्न र पहिलो बैठकबाटै यसलाई टुंगो लगाउन मूख्यमन्त्री डोरमणी पौडेललाई आग्रह गरे । 
उनले एक बर्षसम्म पनि स्थायी राजधानी र नाम टुंगो नलाग्दा जनताले नालायक भन्ने अवस्था आएको भन्दै संघीयता र गणतन्त्र नै कमजोर बनाउने काममा नलाग्न प्रदेश सरकारलाई सुझाव दिए । उनले प्रतिपक्षले सहयोग गर्दा पनि अनिर्णयको बन्दी बनाएर अस्थायी मानसिकतामा सबैलाई नराख्न आग्रह गरे । उनले कानून पनि नबनाउने, विकास बजेट पनि खर्च नगर्ने, राजधानी र नाम समेत नतोक्ने भन्दै सरकारको कटाक्ष गरे । 
उनले एक बर्षको अवधीमा सभामुख सानुकुमार श्रेष्ठले खेलेको भुमिका सन्तुलित रहेकोमा प्रशंसा गर्दै प्रदेशसभालाई विधेयक उपलव्ध गराएर सहयोग गर्न मूख्यमन्त्री डोरमणी पौडेलको ध्यानाकर्षण गराएका थिए ।