निर्माण व्यवसायीहरुको दुई दिने तालिम सम्पन्न

२२ माघ,हेटौँडा ।  निर्माण व्यवसायीहरुलाई मध्यनजर गरेर आयोजना गरिएको ईबिडिङ्गसम्बन्धी दुई दिने तालिम मङ्गलबार सम्पन्न भएको छ । 
निर्माण व्यवसायी संघ मकवानपुरको समन्वय, निर्माण व्यवसाय विकास कार्यान्वयन समितिको सहयोग र नेपाल निर्माण व्यवसायी महासंघको आयोजनामा सोमबारबाट हेटौँडामा सुरु भएको तालिम मंगलबार सम्पन्न भएको हो ।
समापन कार्यक्रममा बोल्दै निर्माण व्यवसायी महासंघ प्रदेश ३ का अध्यक्ष सुवित श्रेष्ठको २०२० सम्ममा पेपरलेस ईबिडिङ्गमा जाने भएकोले निर्माण व्यवसायीलाई प्रतिस्पर्धाका लागि ईबिडिङ्ग आवश्यक भएको भन्दै महासंघले निर्माण व्यवसायीको दक्षता अभिवृद्धि गर्न सहयोग गर्ने बताए । 
श्रेष्ठले तालिमका सहभागीहरुलाई प्रमाणपत्र वितरण गर्दै निर्माणको काममा बोलपत्र भर्दा अरुको भर पर्नुभन्दा आफैले सिप सिकेर भर्नु जान्नु निकै उत्तम हुने बताए । त्यसैगरी महासंघका केन्द्रीय सदस्य होमकुमार शर्माले निर्माण व्यवसायीलाई स्वस्थ्थ प्रतिस्पर्धा गर्न आग्रह गर्दै निर्माण व्यवसायमा प्रतिस्पर्धा बढ्दै गएकोले सिप र दक्षता आवश्यक पर्ने बताए। 
निर्माण व्यवसायी संघ मकवानपुरका अध्यक्ष श्याम ढकालको अध्यक्षतामा भएको तालिमको समापनमा कार्यक्रममा मकवानपुर र चितवनका ५० जना सहभागि निर्माण व्यवसायीहरुलाई प्रमाण पत्र प्रदान गरिएको थियो ।