सिन्धुलीमा जन्ती बोकेको टिपर पल्टिदा २ को मुत्यु 

२४ माघ, सिन्धुली । सिन्धुलीको सुनकोशी गाउँपालिका–२ कमेरेफाँटस्थित विपी राजमार्गमा बुधबार साँझ जन्ती बोकेकोे टिपर दुर्घटना हुँदा दुई जनाको मृत्यु भएको छ भने ४३ जना घाईते भएका छन । 
रामेछापको खाँडादेवी गाउँपालिका–१ कठोरेबाट काभ्रेपलाञ्चोकको तेमालतर्फ बेहुली लिई आउँदै गरेको बा४ख ९४३८ नम्बरको टिपर सिन्धुलीको सुनकोशी गाउँपालिका–२ कमेरेफाँटस्थित विपी राजमार्गमा अनियन्त्रित भई सडक छेउमा पल्टिँदा टिपरमा सवार दुई जनाको मुत्यु भएको हो । 
मुत्यु हुनेमा तेमाल गाउँपालिका–९ का २२ वर्षीया कृष्णमाया माझी र सोही ठाउँ बस्ने १६ वर्षीया चुनपाई लामाको मुत्यु भएको प्रहरी चौकि दुम्जाका प्रहरी प्रमुख प्रहरी नायव निरीक्षक अरुण कुमार यादवले प्रस्ट खबरलाई जानकारी दिएका छन ।  उनिहरुको उपचारका क्रममा धुलिखेलस्थित धुलिखेल सामुदायिक अस्पतालमा मृत्यु भएको प्रहरीले जनाएको छ । 
 घाइते हुनेहरुमध्ये तेमाल गाउँपालिका–९ का १२ वर्षीय दिनेश तामाङ र सोही ठाउँका १२ वर्षीय नीरज माझीको अवस्था गम्भिर  रहेकाले उनिहरु सहित घाइते मध्ये सात जनालाई थप उपचारका लागि काठमाडौँ पठाइएको बताईएको छ । 
प्रहरीले टिपर र टिपर चालक रामेछाप जिल्ला खाँडादेवी गाउँपालिका–१ का ३७ वर्षीय खड्क माझीलाई नियन्त्रणमा लिएको जनाएको छ ।