मकवानपुर प्रहरीले गर्‍यो १८ बालबालिकाको उद्धार 

फोटोः जिप्रका मकवानपुर

२४माघ, हेटौँडा । मकवानपुर प्रहरीले भारत लैजान लागेका अवस्थामा करिब १८ जना बालबालिकाहरूलाई उद्धार गरी परिवारको जिम्मा लगाएको छ । 
प्रहरीले हेटौँडा १० बसपार्कमा हेटौँडा भएर काकडभिट्ट जादै गरेको ना. ६ ख १५२० को बसलाई चेकजाच गर्दा मकवानपुरको विभिन्न स्थानमा बसोबास गर्ने ७ जना बालिका र ११ जना बालक गरी १८ जना बाल बालिकाहरुलाई कानुनी प्रक्रिया नपुर्याई भारतको कालिङ्पोङमा लामा पढ्नको लागि लैजान लागेको अवस्थामा उद्धार गरेको जनाएको छ ।
प्रहरी १८ जना बालबालिकाहरुको साथबाट राक्सिराङ गाउँपालिका वडा नं. १ बस्ने १८बर्षीया साङ्गे मुक्तान र बागमति गाउँपालिका वडा नं. ८ बस्ने २४ बर्षीया सोनाम दोर्जे लामालाई नियन्त्रणमा लिई अनुसन्धान गर्दा मुक्तान र लामाले उक्त बालबालिकाहरुलाई अभिभावकको स्वीकृति लिएर नै लैजान लागेको पाईएको तर अन्य कानुनी प्रक्रियाहरू पुर्याएको नदेखिएकोले माईती नेपाल जिल्ला मकवानपुरका कार्यक्रम संयोजक माया लामा, जिल्ला सेवा केन्द्रका केन्द्र प्रमुख बिन्दा बर्तौला, सिविन बाल हेल्प लाईन मकवापुरका कार्यक्रम संयोजक सम्झना अधिकारीको रोहवरमा  परिवारको जिम्मा लगाइएको जिल्ला प्रहरी कार्यालय मकवानपुरका निम्त प्रहरी प्रवक्ता प्रहरी निरीक्षक मधु कुमार थापाले बताएका छन। 
बालबालिकाहरू लैजान खोज्ने साङ्गे मुक्तान र सोनाम दोर्जे लामाले अभिभावकको स्वीकृति लिएर नै लैजान लागेको खुलेपछि आफन्तहरूको जिम्मा जमानीमा छाडिएको निम्त प्रहरी प्रवक्ता प्रहरी निरीक्षक थापाले बताए ।