भ्रष्टाचारको जालो तोड्न सहज छैनःमुख्य मन्त्री पौडेल

२८ माघ, हेटोँडा । प्रदेश नम्बर ३ का मुख्यमन्त्री डोरमणि पौडेलले मौलाउदै गएको भ्रष्टाचारको जालो तोड्न सहज नभएको बताएका छन । अख्तियार दुरुपयोग अनुसन्धान आयोगको २८ औँ वार्षिकोत्सवका अवसरमा आयोगको हेटौंडा स्थित कार्यालयमा भएको कार्यक्रमलाई सम्बोधन गर्दै मुख्य मन्त्री पौडेलले यसो बताएका हुन ।  
उनले सम्बोधनका क्रममा एक वर्षको अवधिमा प्रदेश सरकारले जनताले अनुभुती गराउने खासै काम गर्न नसकेको भन्दै मुलुकमा भ्रष्टाचार मौलाएको बताए । ‘रकमको लिने र दिने मात्र भ्रष्टाचार होइन तोकिएको समयमा कार्यालयमा रहेर कार्य सम्पादन नगर्नु, सेवाग्राहीको कामलाई आलटाल गरी ढिलो कार्य गर्नु पनि भ्रष्ट्राचार हो’ मुख्य मन्त्री पौडेलले बताए । थप प्रशगंमा पौडेलले सबै मिली अख्तियारलाई हरेक क्षेत्रबाट कार्य सम्पादनमा सहयोग गरेमा भ्रष्टाचारमा कमि आई सुशासन कायम हुने बताए । 
त्यसैगरी कार्यक्रममा बोल्दै मुख्य मन्त्री तथा मन्त्री परिषद कार्यालयका प्रमुखसचिव आनन्दराज ढकालले निजामती कर्माचारीलाई ऐन र कानुनले तोकेको  परिधिभित्र रहेर  सेवाग्राहीलाई सेवा प्रदान गर्न आग्रह गरे ।
कार्यक्रममा अख्तियार दुरुपयोग अनुसन्धान आयोग हेटौँडाका प्रमुख होमकला पाण्डेले एक बर्षको अबधिमा ११ वटा भ्रष्टाचारका स्ट्रिङ अप्रेशनमा १५ जनालाई पक्राउ गरेर मुद्दा दर्ता गरिएको र भ्रष्ट्राचार नियन्त्रणका लागि प्रमुख आयुक्तको नेतृत्वमा अनुसन्धान टोली गठन भएको जानकारी गराईन । 
कार्यक्रममा जिल्ला समन्वय समिति मकवानपुरका प्रमुख रघुनाथ खुलाल ,बाराका प्रमुख नबलकिशोर सिंह, विभिन्न जिल्लाका प्रमुख जिल्ला अधिकारी लगायत विभिन्न सरकारी तथा प्रदेश कार्यालयका प्रमुख, पत्रकार लगायतको सहभागिता रहेको थियो।