रेडियो मकवानपुरको पत्रकारिता सम्मान दाहाललाई

२९ माघ, हेटौंडा।दिव्यतारा बहुउद्देश्यीय सहकारी संस्था लिमिटेडको २० औं स्थापना दिवस तथा सहकारीले सञ्चालन गरिरहेको रेडियो मकवानपुरको नवौं बार्षिकोत्सवको सन्दर्भमा पत्रकार तथा समाजसेवामा सक्रिय व्यक्तिहरुलाई सम्मान गरिएको छ। सहकारीले गोरखापत्र दैनिकका मकवानपुर समाचारदाता राममणि दाहाललाई सम्मानित गरेको छ । 

नेपाल पत्रकार महासंघ मकवानपुरका पूर्व अध्यक्ष दाहालाई पत्रकारिताको माध्यमबाट सञ्चारक्षेत्रमा महत्वपूर्ण योगदान पु¥याएवापत सम्मान गरिएको हो ।  त्यसैगरी मानवसेवा आश्रमका प्रमुख अभियन्ता रामजी अधिकारी र हेटौंडा–१६ त्रिशुले हटियाका कृषक गीता रेग्मीलाई रेडियो मकवानपुरले सामुदायिक सम्मान–२०७५ प्रदान गरिएको छ । 

रेडियोको नवौं बार्षिकोत्सव  सहकारीको २० औं स्थापना दिवसको अवसरमा आयोजित विशेष कार्यक्रममा अधिकारी र रेग्मीलाई नगद ९ हजार ९९९ सहित सम्मान गरेको हो । 

अदिया खेति गरेरै परिवार धान्दै तथा खेत समेत जोड्न सफल रेग्मी र आगामी २०८२ सालभित्र नेपाललाई नै सहयोगाापेक्षी सडक मानवमुक्त बनाउने अभियान स्वरुप सडकमा रहेका मानवहरुको उद्दार, पालनपोषण गर्दै आएको संस्था मानवसेवा आश्रमका प्रमुख अधिकारीलाई रेडियोले सम्मान गरेको हो । बार्षिकोत्सवको सन्दर्भमा रेडियोले दुईजनालाई सामुदायिक सम्मान र तीजको सन्दर्भमा दुईजना महिलालाई जागरुक महिला सम्मान प्रदान गर्दै आएको छ । प्रदेश नम्बर ३ का मुख्यमन्त्री डोरमणी पौडेल, प्रदेश ३ का प्रमुख प्रतिपक्षी दलका नेता ईन्द्रबहादुर बानियाँ, दिव्यतारा सहकारीका अध्यक्ष महालक्ष्मी उपाध्याय डीना र रेडियो सञ्चालक समितिका अध्यक्ष आनन्दराम पराजुलीलगायतले सम्मानपत्र, दोसल्ला, नगद र माला प्रदान गरेका हुन् ।