सालक दिवसमा रानी वनमा अन्तरक्रिया

४ फागुन, हेटौँडा । अन्तराष्ट्रिय सालक दिवसको अवसरमा हेटौडा–६,चौघडामा रहेको रानी सामुदायिक वन उपभोक्ता समूहले सालक संरक्षण सम्वन्धि अन्तरक्रिया कार्यक्रमको आयोजना गरेको छ ।
समूहको चालु आव ०७५/०७६ को स्वीकृत बार्षिक कार्यक्रम अनुसार अन्तरक्रिया कार्यक्रमको आयोजना गरिएको समूहले जनाएको छ । अन्तरक्रिया कार्यक्रमका सहभागिहरुले संरक्षित एवम लोपोन्मुख सूचीमा रहेको सालकको संरक्षण गर्ने कार्यमा सरकारी निकाय, सामुदायिक वन, स्थानीय समुदाय, संघसंस्था एवम सरोकारवालाहरु एक भएर लाग्नु पर्नेमा जोड दिएका थिए । रानी सामुदायिक वनले २०६३ सालदेखि सालकको संरक्षण गर्दै आएको छ । समूहले सालकको बासस्थान, यसको आहार, प्रचारप्रसार, होडिङ बोर्ड र कानूनी व्यवस्थाको बारेमा विभिन्न सामुदायिक वन, विद्यालय, क्लव र अन्य सामाजिक संघसंस्थाहरुका पदाधिकारी, सुरक्षा निकायहरुमा समेत सालक सम्वन्धि कार्यक्रमहरु संचालन गर्दै आएको छ । यस समूहको वन क्षेत्रमा करीव एक दर्जन सालक रहेको समूहका सचिव नानीमाया रुम्वाले बताईन । 
हेटौडा–६ का वडा सदस्य रामहरी राईको प्रमुख आतिथ्यता एवम समूहका अध्यक्ष कृष्ण विडारीको सभाध्यक्षतामा कार्यक्रम भएको थियो । कार्यक्रममा सामुदायिक वन उपभोक्ता महासंघ ३ नं. प्रदेश सदस्य रामहरी चौलागाई, सामुदायिक वन उपभोक्ता महासंघ, मकवानपुरका अध्यक्ष साधुराम चौलागाई, समूहका उपाध्यक्ष डोरबहादर अधिकारी, कार्यालय सचिव भीमसेन पौडेल लगायतले सालकको संरक्षणमा सबैले सहयोग गर्नु पर्नेमा जोड दिएका थिए । 
कार्यक्रममा वन समूहका पदाधिकारी, लेखा समिति, सल्लाहकार, महिला उपसमिति र उपभोक्ताहरुको सहभागिता रहेको थियो ।