लाज जोगाईदिन मनहरी पुगे मूख्यमन्त्री, कार्यक्रम नै फितलो

५ फागुन, हेटौँडा । ठूलो तामझामका साथ उद्घाटनको चर्चा गरिएको मनहरीस्थित काष्ठ तथा फर्निचर उद्योगको कार्यक्रम फितलो भएको छ । 
कार्यक्रममा बोलाईएका प्रमुख अतिथि र विशेष अतिथि नै नआएपछि अन्तिम समयमा आयोजकको लाज जोगाईदिन मूख्यमन्त्री डोरमणी पौडेल कार्यक्रममा पुगेका थिए । मनहरी गाउँपालिका संरक्षक र सामुदायिक वन उपभोक्ता महासंघ मनहरीको अगुवाईमा मनहरी–९ ज्यामिरेमा उद्योगको आइतबार उद्घाटन गरिएको छ । कार्यक्रमको संघीय सरकारका वन तथा वातावरण मन्त्री शक्ति बस्नेत र प्रदेशका उद्योग, पर्यटन, वन तथा वातावरण मन्त्री अरुण नेपालबाट उद्घाटन गर्ने भनिए पनि दुबै नआउने भएपछि आयोजकको लाज जोगाउन मूख्यमन्त्री डोरमणी पौडेल कार्यक्रममा प्रमुख अतिथिको रुपमा पुगेका थिए । 
कार्यक्रममा सम्बन्धित कार्यालय वन डिभिजन कार्यालयबाट समेत कोही प्रतिनिधि पुगेनन् भने लक्षित वन समूहमध्ये केही अनुपस्थित रहेका थिए । कार्यक्रममा जनसहभागिता समेत कमजोर रहेको थियो । आकस्मिक ढंगबाट कार्यक्रममा उपस्थित हुनु परेका कारण प्रमुख अतिथि पौडेल अघि नै बोलेर हिडेका थिए । कार्यक्रममा बोल्ने अधिकांश वक्ताहरुले कार्यक्रममा उपस्थित नहुने अतिथिको कटाक्ष गरेर विताएका थिए । कमिसन खान नपाएर नआएका समेत एक वक्ताले भन्न भ्याएका थिए । कार्यक्रममा सहभागी अतिथिमध्ये थोरैलाई मात्रै बोल्न दिईएको थियो । कार्यक्रममा प्रतिनिधिसभा सदस्य विरोध खतिवडा, प्रदेशसभा सदस्यहरु मुनु सिग्देल, जुनेली श्रेष्ठ, पूर्व संविधानसभा सदस्य राजाराम स्यांतान, गाउँपालिका प्रमुख एकराज उप्रेति, सामुदायिक वन उपभोक्ता महासंघका केन्द्रदेखि जिल्लासम्मका नेताहरुको सहभागिता रहेको थियो । कार्यक्रम फेकोफन मनहरीका अध्यक्ष हेम उप्रतिको अध्यक्षतामा भएको थियो ।
काठ चिरानको समस्या भोग्दै आईरहेका उपभोक्ताहरुको हितमा ध्यानमा राख्दै काष्ठ तथा फर्निचर उद्योगको स्थापना गरिएको जनाईएको छ । ५१ प्रतिशत सामुदायिक वनउपभोक्ता समूहहरुको र बाँकी सर्वसाधारणको शेयर रहने गरी उद्योग संचालनको ढाँचा तयार गरिएको छ । यसअघि हेटौँडाको हर्नामाडि पनि यस्तै सामुदायिक काष्ठ मिल संचालन गरिएको थियो । त्यो काठ मिल अहिले कठिनाईका साथ संचालन भईरहेको छ ।
तस्विरहरु : एकराज उप्रेति र सूचना शिवकुमार काशीको फेसबुकबाट