वाह सरकार !

केशव सञ्जेल

खाँचो पर्दा गोरुजस्तै गरी खटायौ 
निजामति हली लगाई हामीलाई ठटायौ 
आर्मी पुलिस डराएर गाउँ छाडेका बेला
द्वन्द्वकालको डढेलोमा गाउँमा पठायौ !!

साथ दियौँ इमानदार नेता ठानेर
परिवर्तन गर्नेलाई साथ् दिऊँ भनेर 
आज अब सत्ता चढ्यौ उबेलाका मित्र
अहिले घोक्रेठ्याक लायौ शत्रु बनेर !!

समन्वय इकाई र गाउँ/नगरमा हामी
विद्यालय अनुगमन समस्यामा हामी 
थोरै भाउ गाह्रा काम सबै हाम्रा भागमा
तर मार्ने निजामति दुःख गर्ने हामी !!

हामीलाई हुलाकीको संज्ञा भिरायौ
मूल्याङ्कन नै नगरेर तिम्ले बिरायौ 
हाम्रो ईर्ष्या गर्दै जले पेशागतका पनि
हामीलाई बिनाकामका भनी गिरायौ !!

हाम्रा कामले आज शिक्षा माथि उठायौ
दातृ संस्था मुलुकबाट स्रोत जुटायौ 
लोकतन्त्रमा सबैलाई अवसर दिन्छु भन्थ्यौ
सट्टा शिक्षक अस्थायी आरपी घर पठायौ !!

तिम्रा तलब सुबिधा चाहिँ थप्दै थप्दै जाऊ
फेरि चुनाव लड्नुपर्छ खर्च जोड्दै जाऊ
समृद्धिको नारा लाउन खटाऊ कार्यकर्ता
जनताका दिलबाट पाइला मोड्दै जाऊ !!

तस्करहरू साथी बनाऊ खट्नेलाई भुल
बलात्कारी हत्यारालाई पार्टीभित्र हुल 
दुई तिहाइ छँदै छनि कस्ले के नाप्छ र?
यही हो मौका नभुल है सपार आफ्नो कुल !!

भलो हुन्न काम गर्नेको आँसु झार्नेलाई
अपमानको पीडा दिई बेहाल पार्नेलाई 
समय हो घुम्दै आउँछ पालो तलमाथि 
कमजोर ठानी सहृदयी आत्मा मार्नेलाई !!

धन्यवाद 
२०७५/११/०९ हेटौडा, 
स्रोतव्यक्ति, मकवानपुर