मानवसेवाको अनुष्ठानमा पहिलो दिन १७ लाख सहयोग

१३ फागुन, हेटौँडा । मानव सेवा आश्रममा सोमबारबाट शुरु भएको मानवता प्रवद्र्धन ज्ञान विज्ञान अनुष्ठानमा पहिलो दिनै १७ लाख रुपैँया सहयोग जुटेको छ ।
मानवता प्रवद्र्धन एवम् मानवसेवा आश्रमको भवन निर्माण सम्पन्न गर्ने उद्धेश्यले शुरु भएको अनुष्ठानमा पहिलो दिन नै १७ लाख रुपैँया सहयोग जुटेको हो । पहिलो दिन हेटौँडा स्कुल अफ म्यानेजमेन्टका पुरणबहादुर जोशीबाट १० लाख, पञ्चसिद्धी फाउण्डेशनका सिद्धिलाल श्रेष्ठबाट १ लाख, मह सञ्चार काठमाडौंबाट १ लाख, धु्रवराज भट्टराई ५५ हजार ५ सय ५५, डा.कपिल देव उपाध्यायबाट ५१ हजार, मदन कृष्ण श्रेष्ठबाट ५०,०००, नेपाली पाठशाला ईपिलेट, अष्ट्रेलिया, हरिवंश आचार्य – ५० हजार रुपैँयासहित अन्य महानुभावबाट सहयोग प्राप्त भएको जनाईएको छ । 
कार्यक्रम प्रदेश नम्बर ३ का सभामुख सानुकुमार श्रेष्ठको प्रमुख आतिथ्यता एवं अनुष्ठानका संयोजक पुरणबहादुर जोशीको अध्यक्षतामा भएको थियो । कार्यक्रममा प्रतिनीधिसभा सदस्य विरोध खतिवडा, प्रदेशका सामाजिक विकासमन्त्री युवराज दुलाल, प्रदेश सभा सदस्य माननीय मुनु सिग्देल, प्रदेशका प्रमुख सचिव आनन्दराज ढकाल, मानवसेवा आश्रमका प्रमुख संरक्षक डा.गोविन्द टण्डन, मानवसेवा आश्रमका सद्भावनादुत मदनकृष्ण श्रेष्ठ र हरिबंश आचार्य, हेटौँडा उपमहानगरपालिकाका प्रमुख हरिबोल महत, महायज्ञका प्रमुख वाचक चैतन्यकृष्ण महाराजजी लगायतको उपस्थिति रहेको थियो । 
अनुष्ठान फागुन २० गतेसम्म हेटौँडा–९ लामसुरेधापमा हुनेछ ।