हेटौँडामा नेपाली राष्ट्रिय क्रिकेट टोलीले म्याच खेल्ने

२० फागुन, हेटौँडा । नेपाली राष्ट्रिय क्रिकेट टोलीले हेटौँडामा टि–२० क्रिकेट खेल्ने भएको छन् ।
हुप्रचौर खेल मैदानमा नेपाली राष्ट्रिय क्रिकेट टोलीका कप्तान पारस खड्का नेतृत्वको पारस खड्का ११ र एमसिसी ११ बीच फागुन २५ गते मैत्रीपूर्ण प्रतियोगिता हुने भएको हो । ब्लड क्यान्सरबाट प्रभावित मकवानपुरे क्रिकेट खेलाडि निरज श्रेष्ठको उपचारमा सहयोग जुटाउने उद्धेश्यले राष्ट्रिय क्रिकेट टोली र एमसिसी ११ बीच प्रतियोगिता हुन लागेको सोमबार हेटौँडामा पत्रकार सम्मेलन गरी जानकारी दिईएको छ । 
प्रतियोगितामा राष्ट्रिय क्रिकेट टोलीका पारस खड्कासहित मेहबुब आलम, आरिफ शेख, आसिफ शेख, अमित श्रेष्ठ, सन्दिप जोरा, अनिल शाह, अनिलकुमार मण्डल, सोमपाल कामी, रामनरेश गिरी, दिपेन्द्रसिंह ऐरी, शशी केशरी र राजु खड्का छन् । एमसिसी ११ मा मकवानपुरका क्रिकेटरसहित सिजन्स व्याडका सुजिल कर्माचार्य, बड्स व्याडका बिजय कार्की, गायक कमल के क्षेत्री, गायिका विद्या तिवारी, फुटबलका राष्ट्रिय खेलाडि अञ्जन विष्ट र रञ्जन विष्टले खेल्ने छन् । क्रिकेट टोलीलाई हेटौँडा उपमहानगरपालिकाले सम्मान गर्दै हेटौंडा बजार परिक्रमा गराउने समेत कार्यक्रम रहेको छ ।
हेटौँडा क्रिकेट एकेडेमी, मकवानपुर क्रिकेट संघ, मदन भण्डारी स्पोर्टस एकेडेमीको र जिल्ला खेलकुद विकास समितिको सहकार्यमा प्रतियोगिता हुन लागेको कार्यक्रम संयोजक अनुप सिनोरियाले जनाएका छन् । मकवानपुरको क्रिकेट क्षेत्रको उत्थानमा लागेका श्रेष्ठको उपचारमा ५० लाख रुपैँया भन्दा बढि खर्च भईसकेको जनाईएको छ । राजिब गान्धी अस्पताल दिल्लीमा उपचाररत उनको उपचारमा अझै ५० लाखको हाराहारीमा खर्च लाग्ने बताउँदै आयोजकले मैत्रिपूर्ण प्रतियोगिताबाट २० लाख रुपैंया संकलन गर्ने लक्ष्य राखेको छ । उनी हाल मकवानपुर क्रिकेट संघका कोषाध्यक्ष रहेका छन् । 
टिकट खरिद गरी राष्ट्रिय टोलीको खेल हेर्ने अवसरसंगै क्रिकेट खेलाडिको उपचारमा सहयोग गरिदिन आयोजकले अनुरोध गरेको छ । पत्रकार सम्मेलनमा प्रतियोगिताका प्रचारप्रसार संयोजक सानु लामा, सहसंयोजक निरजसिंह ठकुरी, प्रेम क्षेत्री, राष्ट्रिय एम्पायर विनोद बानियाँ लगायतको सहभागिता रहेको थियो ।